बायुसेवा निगमया कंसाकारविरुद्ध विशेष अदालतय् मुद्दा दायर
अख्तियार दुरुपयोग अनुसन्धान आयोगं नेपाल वायु सेवा निगमया कार्यकारी नायः सुगतरत्न कंसाकारविरुद्ध विमान न्यायेगु प्रकि्रयाय् अनियमितता याःगु धासें विशेष अदालतय् थौं मुद्दा दायर याःगु दु । मुद्दा दायर यायेधुंकाः कंसाकार स्वतः पदपाखें मुक्त जूगु दु । अख्तियारं निगमया कायम मुकायम महाप्रवन्धक राजबहादुर केसी कायम मुकायम प्राविधिक महाप्रवन्धक गणेश ठाकुर कायम मुकायम निर्देशक ज्ञानेन्द्रपुरुष ढकाल निर्देशक मयुरशम्सेर राणा व उपनिर्देशक ईश्वरराज शर्मायात नं अनियमिताय् मतियारयारुपं मुद्दा दायर याःगु खः । निगमय् भ्रष्टाचार याःगु धासें उपिविरुद्ध भ्रष्टाचार निवारण ऐन २०५९ कथं सजाँय माग याःगु दु ।
सन्चालक समितिया अनुमोदन व स्वीकृत बेगर युरोपपाखें एयर बस कम्पनीयात न्यागू करोड न्हय्स्वंगू लाख न्हय्न्याद्वः तका धेबा भुक्तानी ब्यूगु धासें विशेष अदालतय् मुद्दा दायर याःगु खः । निगमं एयर बस मन्याइगु जुइवं बैना धेबा लिहाँ मवइगु जूगु दु । निगमं जहाज न्यायेत्यंगु विषयलय् व्यवस्थापिका संसदया सार्बजनिक लेखा समितिइ ताःहाकःगु बहस व कचवं जुइवं समिति जहाज न्यायेगुलि पंगः थंगु खः । उकियाबारे हे अख्तियारं अनुसन्धान याःगु खः ।
