थीथी थासय् सतक दुर्घटना, च्याम्ह सित, झिंन्याम्ह घाःपाः
देय्या थीथी थासय् थौं जूगु ब्यागलं ब्यागलं दुर्घटनाय् च्याम्ह सीगु दुसाः झिंन्याम्ह घाःपाः जूगु दु ।
थौं सुथय् गुल्मीं बुटवल वनाच्वंगु लु. १. ज. ३६६९ नम्बरया जीप पाल्पाया मस्याम-केरावारीलय् दुर्घटना जुयाः न्याम्ह घटनास्थलय् हे सीगु खःसा दुर्घटनाय् स्वम्ह घाःपाः जूगु दु । दुर्घटनाय् लानाः जीप चालक सल्यान हिल्चिा गाविसया शेरबहादुर थापा, गुल्मी तुराङया खुइच्यादँया धनबहादुर बस्नेत व न्यय्नीदँया दिलबहादुर रजाली सीगु दु । अथेहे तुराङ गाविसया पीन्यादँया नारायण खनाल व तुराङ गाविसया हे पीच्यादँया खगेश्वर अर्याल घटनास्थलय् हे सीगु खँ पाल्पा स्थित दोभान प्रहरी चौकीं धाःगु दु ।
दुर्घटनाय् घाःपाः जुम्ह रुपन्देही चिल्हिया गाविसया नीखुइदँया कमल अर्याल व चिल्हिया ४या आरती खनालया लुम्बिनी अञ्चल अस्पतालय् वासः जुयाच्वंगु दु । घाःपाः जुम्ह छम्ह मिसाया पाल्पाया प्रभासस्थित लुम्बिनी मेडिकल कलेजय् वासः जुयाच्वंगु दु । जीप सिद्धार्थ राजमार्गया बुटवल-पाल्पा सतक खण्डय् लाःगु केराबारी सतकं सच्छि व न्यय्गू मिटर क्वये मस्र्याङ्दी खुसिइ कुतुवंगु खः ।
अथेहे प्युठानया स्वर्गद्वारीं रोल्पाया लिवाङ वनाच्वंगु रा. १. ज. १९३ नम्बरया जीप घरपानी धइगु थासय् दुर्घटना जुयाः जीप मालिक रुद्रबहादुर महरा सीगु दु । थौं हे धादिङया पिडा गाविसय् ना. २. ख. १३०४ नम्बरया बस व ना. २. ख. ६७८० नम्बरया ट्रक ठक्कर नयाः झिम्ह घाःपाः जूगु दु । घाःपाः जूपिं निम्हेसिया अवस्था गम्भिर दु ।
थुके येँया कलंकीइ बा. २. ख. १८१६ नम्बरया भाडाया लःया ट्यांकरया ठक्करं बा. ४२. प. ३०९८ नम्बरया मोटरसाइकलय् सवार नीनिदँया गौरव ढकाल सीवं थौं अनया स्थानीयवासीतय्सं सुथय् प्रदर्शन याःगु दु । मोटरसाइकल ल्यूने च्वनावःम्ह राम ढकाल दुर्घटनाय् घाःपाः जूगु दु ।
