सत्तारुढ पार्टीया भातृ संगठनपाखें स्वनिगः बन्द
सरकारय् दुगु मू निगू दल एमाले व कांग्रेसया विद्यार्थि संगठनदथुइ येँया त्रिचन्द्र क्याम्पसय् जूगु ल्वापुयात कयाः एमाले अखिलं थौं स्वनिगः बन्द याःगु दु । सत्तारुढ दल नेकपा एमालेया विद्यार्थी संगठन अनेरास्ववियुया बन्दया कारण थौं स्वनिगःया जनजीवन प्रभावित जूगु दु । स्वनिगलय् थौं सार्वजनिक सवारी साधन उलि न्ह्याःगु मदुसा बजाः नं म्हो जक चाःगु खनेदु । येँया मू मू क्याम्पस न्ह्यःने विद्यार्थीतय्सं प्रदर्शन यानाः चक्काजाम याःसां नं मेमेगु थासय् बन्दया खासै प्रभाव लाःगु मदु ।
न्हिनय् झिनिताः ईतक्क स्वनिगः बन्दया ग्वसाः ग्वःगु जूसां तबि प्रदर्शनया झ्वलय् प्रहरीं थीथी थासं प्रदर्शनकारीतय्त ज्वंगु दुसा उमित याकनं स्वयाः याकनं मत्वःतूसा झिनिताः इलय् नं लित मकायेगु ख्याच्वः नापं बन्दकर्तां जानकारी ब्यूगु दु ।
प्रदर्शनय् कुहाँवःपि त्रिचन्द्र क्याम्पसया नीप्यम्ह व आर आर क्याम्पसया झिन्याम्ह अनेरास्ववियु सम्बद्ध विद्यार्थीतय्त प्रहरीं नियन्त्रणय् काःगु दु । आर आर क्याम्पसया स्ववियु छ्यान्जे विनोद खनाल आरसी लामिछाने किसन राई लगायतिपंत ज्वंगु खः । उपि फुक्कसित थ्व इलय् नेपाल पुलिस क्लबय् तयातःगु दु ।
जिल्ला प्रशासन ज्याकुथिइ म्हिगः जूगु वार्ताय् थः कार्यकर्तादथुइ आक्रमण याःपित कारवाहीया निति प्रशासन गम्भीर मजूगु धासें स्वनिगः वन्दया इनाप यानाःगु अनेरास्ववियुया न्वकु लक्ष्मण लम्सालं जानकारी बियादीगु दु । थः हे पार्टी नेता नापं जुयाच्वंम्ह गृहमन्त्री भिम रावलं लिपांगु इलय् वयाः वार्ताया निति ई बिइमफूगु धायेवं थःपिके बन्दया विकल्प मदुगु संगठनं जानकारी ब्यूगु दु ।
थःपिनि हे माउ दलं सरकारया नेतृत्व यानाच्वंगु इलय् वार्तापाखें सहमति पिकाये माःगुलिइ अनेरास्ववियुं बन्द इनाप यानाः जनतायात दुःख ब्यूगु सर्वसाधारणया नुगः खँ दु ।
