छुं नं सहलह मजुसें विशेष अधिवेशन क्वचाल
एकीकृत नेकपा (माओवादी) सहित खुगू दलं दर्ता याःगु समावेदन लिपा राष्ट्रपति डा. रामवरण यादवं आव्हान यानादीगु विशेष अधिवेशनय् छुं नं सहलह मजुइकं थौं क्वचाःगु दु ।
स्वंगू प्रमुख दलत दथुइ नियमित अधिवेशन सःतेगु सहमति लिपा थौं च्वंगु विशेष अधिवेशनय् माओवादीं दर्ता याःगु निगू प्रस्ताव लितकायेवं संसद अधिवेशन क्वाचाःगु घोषणा याःगु खः । माओवादी प्रमुख सचेतक पोष्टबहादुर बोगटीं संसदय् न्ववासें दलत दथुइ न्हूगु सहमति जूगुलिं प्रस्तावया औचित्य मदुगु धासें प्रस्ताव लितकयादीगु खः ।
वस्वयां न्ह्यः सरकारया पाखें संस्कृति मन्त्री मिनेन्द्र रिजालं सरकारं अविलम्ब नियमित अधिवेशन सःतेगु व सरकार निर्माणया निंतिं पहल यायेगु प्रतिबद्धता प्वंकादीगु खः ।
सरकार, विपक्षी व मेमेगू दलया नेतातय्सं न्ववाये धुंकाः सभामुख सुभाषचन्द्र नेम्वाङं राष्ट्रपति यादवं संसद अधिवेशन क्वचाःगु खँ न्ह्यथनातःगु पौ संसदय् ब्वनाः न्यंकेदीगु खः ।
