त्रिचन्द्र क्याम्पस अनिश्चिताकालया निंतिं बन्द
येँय् च्वंगु त्रिचन्द्र क्याम्पस अनिश्चितकालया निंतिं बन्द जूगु दु । सत्तारुढ निगू दल निकट विद्यार्थी संगठन अनेरास्ववियु व नेपाल विद्यार्थी युनियन दथुइ छुं दिं न्ह्यः जूगु ल्वापुया तनाव अझ दनीगुलिं क्याम्पस प्रशासनं अनिश्चितकालया निंतिं क्याम्पस बन्द याःगु खः ।
निगू विद्यार्थी संगठन दथुइ क्याम्पस दुने हे तःक्वः ल्वापु जुयाच्वंगुलिं क्याम्पसय् ब्वनिपिं विद्यार्थीतय्त प्रतिकूल लिच्वःगु लाःगु खँ प्रशासनं धाःगु दु ।
थ्वहे दथुइ अखिलं थः विद्यार्थी नेता वीरेन्द रावतया ल्हाः पाला ब्यूम्ह नेवि संघया वीरेन्द्र गिरीयात प्रहरीं अझ नं मज्वंगु धासें कन्हय् स्वनिगः बन्दया आव्हान याःगु दु । उखे नेवि संघं थौं छगू पत्रकार सम्मेलन यानाः थः विद्यार्थी नेता सुरेशकुमार यादवयात २४ घण्टा दुने मत्वःतुसाः उकीया विरुद्ध आन्दोलन यायेगु ख्याच्वः ब्यूगु दु ।
