नियमित अधिवेशन सःतेगु सहमित
प्रमुख स्वंगू दलत दथुइ विशेष अधिवेशयात क्वचायेकाः नियमित अधिवेशन सःतेगु सहमति जूगु दु ।
सिंहदरवार स्थित शान्ति मन्त्रालयलय् च्वंगु एकीकृत नेकपा (माओवादी), नेपाली कांग्रेस व नेकपा (एमाले)या शीर्ष नेतातय् मुँज्याय् उगु सहमति जूगु खः । मुँज्याय् माओवादीं विशेष अधिवेशनया निंतिं संसदय् दर्ता याकूगु प्रस्ताव लितकायेत सहमति प्वंकूगु खः ।
सहमति कथं विशेष अधिवेशनय् माओवादीं थःगु प्रस्ताव लितकायेगु व सरकारं नियमित अधिवेशन सःतीगु व नियमित अधिवेशनया न्हापांगु प्राथमिकताय् प्रधानमनत्रीया निर्वाचनयात तयेगु खँ क्वःछिउगु दु ।
मुँज्या लिपा माओवादी न्वकू नारायणकाजी श्रेष्ठ 'प्रकाशं' थःपिंसं प्रधानमन्त्री ल्ययेगु निंतिं हे विशेष अधिवेशन सःताःगु व आः दलत दथुइ नं नियमित अधिवेशन पाखें प्रधानमन्त्री ल्ययेगु ज्यायात हे प्राथमिकताय् तयेगु सहमति जूगुलिं थःपिंसं दर्ता यानाःगु प्रस्ताव लितकायेगु धयादिल ।
स्वंगू दलं नियमित अधिवेशन न्ह्यः हे दलत दथुइ सहमतिया सरकार गठन यायेत तीव्र रुपं सहलह यायेगु नं क्वःछिउगु दु ।
