नेविसंघ व अखिलया थःथःगु तयारी
येँ (सन्ध्या टाइम्स)/त्रिचन्द्र कलेजय् जूगु ल्वापुयात कयाः नेपाली कांग्रेसया नेपाल विद्यार्थी संघ व एमाले अखिलं थःथःगु हे कथं तयारी यानाच्वंगु दु ।
एमाले अखिलं दोषीयात ज्वनाः कारवाही मयात धाःसा कन्हय् स्वनिगः बन्द यायेगु निंतिं थौं तःजिक कार्यकर्ता भेला याइगु जूगु दु। अथे हे थौं बहनी प्रदर्शनीमार्ग लागां मसाल जुलुस पिकायेगु तयारी यानाच्वंगु दु। उकथं हे त्रिचन्द्र कलेजया घटनायात कयाः थौं नेविसंघं थःपिनि आधिकारिक धारणा सार्वजनिक याइगु जूगु दु। थःपिनि धारणा सार्वजनिक नापं गिरफ्तार जूपिं थः कार्यकर्तायात मत्वःतल धाःसा आन्दोलन यायेगु जानकारी बीत थौं पत्रकार सम्मेलन यायेत्यनागु खँ नेविसंघया कार्यालय सचिव रामप्रसाद अधिकारीं धयादीगु दु ।
थ्वहे दथुइ म्हिगः बहनी नं त्रिचन्द्र कलेजय् ल्वापु जूगु इलय् नेविसंघया छम्ह कार्यकर्तायात छुरां सुयाः घाःपाः याना बिउगु दुसा स्ववियु ज्याकुथिइ तकं मि तया बिउगु दु ।
