रुबेल चौधरी विरुद्ध सर्वोच्च अदालतय् मुद्धा दायर
टाइगर टप्स गोलीकाण्ड लिपा चर्चाय् वःम्ह रुबेल चौधरी विरुद्ध सर्वोच्च अदालतय् मुद्धा दायर जूगु दु । मुद्धाय् रुबेल चौधरीया नापं प्रधानमन्त्री माधव कुमार नेपाल उपप्रधानमन्त्री नापं रुबेलया ससमां सुजाता कोइराला गृहमन्त्री व प्रहरी महानिरीक्षक नापंयापिन्त विपक्षी दयेकातःगु दु ।
इन्द्र ठकुरीं सर्वोच्चय् दायर याःगु रिटय् थीथी काण्डय् रुबेल चौकरीया ल्हाः दुगु बारे नेपाली जनतायात जानकारी बिइगु व वय्कःयात कारवाही यायेत माग यानातःगु दु । मंसिरया लिपांगु वालय् चितवनया टाइगर टप्स होटलय् अय्ला त्वना पुलांम्ह युवराज पारस शाह व रुबेल चौधरी दथुइ कचवं जुइवं पारसं हवाई फायर यायेवं घटना तसकं बय्बय् जूगु खः । गोलीकाण्ड लिपा पारसं प्रेस विज्ञप्ति पिथना थःम्हं हवाइ फायर यानागु स्वीकार याःगु खःसा रुबेलं थः पारसया गोलीं मुस्किलं बचे जुयागु धाःगु खः ।
तर छुं दिं मबिइवं पारसं थम्हं गोलीं मकयेकागु व रुबेलं पारसया ल्हातय् पेस्तोल मखनागु धयाहःगु दु । रुवेलं पारस विरुद्ध उजुरी मबिइवं सरकारं हे पारस विरुद्ध कारवाही शुरु याःगु खः । स्वन्हू तक प्रहरीया हिरासतय् च्वंसां झिद्वः तका धरौटी तया पारस पिहाँवःगु खः ।थुखे प्रहरीं उपप्रधानमन्त्री सुजाता कोइरालाया छेँ वया रुबेलया बयान काःगु खः ।
