'पौडलं उम्मेदवारी लितकाःसा प्रस्ताव लितकायेफइ'
पौडेलया उम्मेदवारी लितकायेत तयार : मन्त्री खाँड
एकीकृत नेकपा (माओवादी)या नायः पुष्पकमल दाहाल 'प्रचण्डं' प्रधानमन्त्री निर्वाचनया याकः उम्मेदवार कांग्रेस संसदीय दलया नेता रामचन्द्र पौडेलं उम्मेदवारी लितकाःसा थःपिंसं नं विशेष अधिवेशयन निंतिं दर्ता याःगु प्रस्ताव लितकायेफइगु खँ धयादीगु दु ।
नेकपा (एमाले)या नायः झलनाथ खनालनाप थौं सुथय् जूगु खँल्हाबंलाय् नायः प्रचण्डं प्रस्ताव लितकाये न्ह्यः पौडेलं उम्मेदवारी लितकायेमाःगु खँ धयादीगु खः । माओवादीं विशेष अधिवेशनय् सहलह यायेगु निंतिं निगू प्रस्ताव दर्ता याःगु दु ।
थौं सुथय् हे प्रचण्ड निवास न्हू बजारय् च्वंगु माओवादी पदाधिकारीतय् मुँज्यां थःपिंसं दर्ता याःगु प्रस्तावयात समर्थन यायेत फुक्कं दलतय्त इनाप याःगु दु ।
उखे सिंचाई मन्त्री बालकृष्ण खाँडं रामचन्द्र पौडेलया उम्मेदवारी लितकायेफइगु खँ धयादीगु दु । थौं रिपोटर्स क्लबं बुटवलय् याःगु पत्रकार सम्मेलनय् वय्कलं मेगू फुक्कं खँय् सहमति जुयाः प्रधानमन्त्रीया जक खँय् असहमति जुइगु खःसा कांग्रेस पौडेलया उम्मेदवारी लितकायेत तयार दुगु धयादीगु खः ।
