सिलबन्दी यानातःगु रियल जुस गायब
बाराया रामपुरस्थित डाबर नेपाल प्रालिलय् अख्तियार दुरुपयोग अनुसन्धान आयोग व राजश्व अनुसन्धान विभागं सोमवाः छापा मारे यानाः सिलबन्दी याःगुलिं रियल जुसया उद्योग व्यवस्थापनं सिलबन्दी यानातःगु जुस चांचां गायब याःगु खँ सीदुगु दु ।
अख्तियार व राजश्वं छापा मारे याःगु रियल जुसयात उद्योग व्यवस्थापनं सोमबार बहनी हे ट्रकय् तयाः मेगू थासय् यंकूगु खँ सीदुगु दु । सोमवाः गोदामय् छापा मारे यानाः ४ करोड बराबरया ७४,००० कार्टुन रियल जुसयात सिलबन्दी याःगु खः ।
थ्वहे दथुइ अख्तियार दुरुपयोग अनुसन्धान आयोगं गुणस्तरहीन जुस प्रत्पादन याःगु धासें थनिंनिसें अनुसन्धान न्ह्याकूगु दु । बहुराष्ट्रिय कम्पनी डाबर नेपालया उत्पादन रियल जुस गुणस्तरीय जूगु दाबी यासें उकीया विरुद्ध अख्तियारय् उजुरी लाःगु खः ।
उजुरीया हे आधारय् वंगु सोमवाः छापा मारे याःगु इलय् रियल जुसया प्याकेटय् उत्पादन मिति लिपाया तयातःगु लुइकूगु खः । छापा मारे यायेगु झ्वलय् डाबरं वंगु नोभेम्बर २०१०य् हे प्याकिङ यानातःगु रियल जुसया प्याकेटय् वइगु सन् २०११ जनवरीलय् उत्पादन जूगु मिति तयातःगु लूगु खः ।
