माओवादी प्रस्ताव व पौडेलया विपक्षय् मत तयेत निर्देशन
येँ (सन्ध्या टाइम्स)/नेकपा (एमालें) कन्हय् जुइगु व्यवस्थापिका संसदया विशेष अधिवेशनय् एकीकृत माओवादीया प्रस्ताव व नेपाली कांग्रेस संसदीय दलया नेता रामचन्द्र पौडेलया उम्मेदवारया विपक्षय् अनिवार्य रुपं मतदान यायेत एमालेया सांसदतय्त निर्देशन बिउगु दु। थौं सिंहदरवारस्थित एमाले संसदीय दलया ज्याकुथी सांसदतय्त थ्व निर्देशन बिउगु खः ।
संसदीय दलया बैठक लिपा एमाले अध्यक्ष झलनाथ खनालं केन्द्रीय कमिटीया निर्णयय् हे पार्टी अडिग जुयाच्वंगु दु धकाः जानकारी बियादीगु खः। वय्कलं माओवादीया विशेष अधिवेशनया निंतिं दर्ता याःगु प्रस्ताव व कांग्रेसं प्रधानमन्त्रीया उम्मेदवारी लित कायेगु सहमतिया वातावरण दयेकेमाःगु खँय् बः बियादीगु दु ।
थौंया बैठकय् प्रधानमन्त्री माधवकुमार नेपालं रामचन्द्र पौडेलयात केन्द्रीय समितिया बैठकं याःगु निर्णया अःखः प्रधानमन्त्री दयेकेगु धकाः तयादीगु प्रस्तावयात कयाः एमालेया सांसद्तय्सं कडा आपत्ति प्वंकूगु खः। बैठकय् सांसदतय्सं सरकारया नेतृत्व यानाच्वंगु दलया ल्याखं एमालें दलतय्त सहमतिइ हये मफुगु खँयात कयाः नं नेतृत्वया आलोचना याःगु खः ।
