'अनमिनया म्याद थप यात धाःसा राज्य कमजोर जुइ'

येँ (सन्ध्या टाइम्स)/ कामचलाउ सरकाया प्रवक्ता सूचना तथा संचारमन्त्री शंकर पोखरेलं संयुक्त राष्ट्र संघीय मिसन अनमिनया म्याद हानं थपे यात धाःसा राज्य कमजोर जुइ धयादीगु दु ।

थौं दाङया तुलसीपुरय् स्थानयि संचारकर्मीलिसे खँल्हासें वय्कलं थ्व खँ धयादीगु खः। न्हापा हे अनमिनया म्याद अन्तिम पटकया निंतिं धकाः थपे यानागु खः धासें वय्कलं नेपाली सेनायात अनमिनया निगरानीइ ताः ई तक तया तल धाःसा सेनाया मनोबल कमजोर जुइगु व सैन्य दक्षता विकासया नितिं नं गतिविधि याये मफइगु जुयाः आः अनमिनयात बिदा हे बीगु जुइ धयादिल ।

अनमिनयात अन्तिम पटक म्याद थप यायेगु सहमति याःगु एकीकृत माओवादीं हाकनं अनमिनयात कायम यायेमाः धकाः खँ हःगु धइगु अनमिनया म्याद थपे यानाः नेपाली सेनायात नियन्त्रणय् कायेगु षडयन्त्र खः धकाः नं वय्कलं धयादिल ।

वय्कलं धयादिल, 'ताः ई तक अनमिनया निगरानीइ नेपाली सेनायात तया तयेगु ज्या जुल धाःसा उकिं यानाः नेपाली सेनां थःगु गतिविधि याये खनी मखु, सेनाया दक्षता नापं सांगठनिक विकासय् तकं लिच्वः लाइ, उकिं अनमिनयात थन तया तयेगु धइगु हे राज्ययात कमजोर यायेगु खः धइगु मान्यतां हे अनमिनयात विदाई यायेगु अनिवार्य दु ।'

सुरक्षा परिषद् राजदूततलिसे माओवादीया सहलह
एकीकृत माओवादीं अनमिनया म्याद जेष्ठ १४ गते तकया निंतिं थप यायेमाः धकाः संयुक्त राष्ट्रसंघया सुरक्षा परिषदय् दुथ्याःगु थीथी देय्या राजदूततलिसे थौं सुथय् सहलह ब्याकूगु दु। माओवादीया अध्यक्ष प्रचण्डं अमेरिका, बेलायत, चीन, फ्रान्स नापं थीथी देय्या राजदूतलिसे सहलह ब्याकाः अनमिनया म्याद थप यायेगु निंतिं कुतः भूमिका म्हितेत इनाप यानादीगु खःसा वय्कःपिंसं सकारात्मक रुपं काःगु खँ सीदुगु दु ।