तःजिक न्यायेकल ज्यापु दिवस

येँ (सन्ध्या टाइम्स)/न्हय्क्वःगु ज्यापु दिवस म्हिगः बसन्तपुली छगू समारोहया दथुइ न्यायेकल। प्रधानमन्त्री माधव नेपालं ज्याझ्वःया उलेज्या यानादीगु खः ।

ज्याझ्वलय् न्ववासें वय्कलं नेपाःयात माःगु शान्ति नेपाःमितय्सं हे पलिस्था यायेफु, आः अनमिनया आवश्यकता मदु धयादिल ।

संस्कृति मन्त्री डा. मिनेन्द्र रिजालं थुगुसीया पर्यटन दँ ताःलाकेत ज्यापु समुदायं तःधंगु योगदान बी फइगु खँ कनादिल। ज्यापु संस्कृति विकास कोषया संरक्षक नापं सभासद् तिर्थराम डंगोलं ज्यापु दिवसया उपलब्धी धइगु ज्यापु समुदाय जक मखु सम्पूर्ण राष्ट्र व जनताया हे उपलब्धी खः धयादिल ।

ज्याझ्वलय् ज्यापु प्रतिभा सिरपाः संस्कृति महर्जन, ज्यापु प्रतिभा शिक्षा सिरपाः लक्ष्मी महर्जन, संस्कृति तथा संगीत सिरपाः हरि महर्जन, खेलकुद सिरपाः बिनिता महर्जन (उसु, कराँते), दिपक महर्जन (बक्सिङ), रामकृष्ण महर्जन (एथलेन्टिक्स) यात लःल्हाःगु खःसा संचारपाखे फोटो पत्रकार नातिकाजी महर्जन, ज्यापु सेवा पदक देवी प्याखं किलागःया इन्द्र महर्जनयात, ज्यापु रत्न देवनारायण महर्जनयात, ज्यापु सम्मान मनोज खड्गी, विकास चित्रकार व पत्रकार प्रदिपमान श्रेष्ठ व ज्यापु प्रज्ञा पुरस्कार नेपालभाषा एकेडेमीया सदस्य सचिव इन्द्र मालीयात लःल्हाःगु खः ।

ज्यापु संस्कृति विकास कोषपाखें २०६१ सालंनिसें ज्यापु दिवस हनेगु याना वयाच्वंगु खः। थुगुसी कंग अजिमाः खलःपाखें पाःब्व कयाः थ्व दिवस न्यायेकूगु खः। थ्व झ्वलय् वंगु लछि न्ह्यवंनिसें हिदान, मोटरसाइकल र्‍याली, सुकुन्दा र्‍याली, पाय्म्वः विमोचन आदि ज्याझ्वःत याना वःगु खः ।

ज्यापु संस्कृति विकास कोषया अध्यक्ष जुजुभाइ डंगोलंया अध्यक्षताय् म्हिगः जूगु मू ज्याझ्वलय् त्वाःया नायः पूर्ण महर्जनं लसकुस यानादीगु खःसा ज्यापु महागुथिया नायः विपेन्द्र महर्जनं भिंतुना देछानादीगु खः ।

समारोह न्ह्यः धिमे व धुन्या नापं सांस्कृतिक र्‍याली पिकयाः देय्चाःहिउगु खः। र्‍यालीया उलेज्या कंग अजिमा खलःया नायः रामकृष्ण महर्जनं यानादीगु खः ।