सरकारया नेतृत्व बारे एमाले दुने कच्वं
नेकपा (एमाले)या नेता नापं प्रधानमन्त्री माधवकुमार नेपालं कांग्रेस नेता रामचन्द्र पौडेलयात प्रधानमन्त्री दयेकेमाःगु प्रस्ताव हयेवं पार्टी दुने कच्वं ब्वलंगु दु ।
थौं सिंहदरवारय् च्वंगु एमाले संविधानसभा दलया मुँज्याय् प्रधानमन्त्री नेपालया प्रस्तावयात एमालेया छुंछुं सस्थापन पक्षया सभासदतय्सं विरोध यायेवं प्रधानमन्त्री नेपालं पार्टी नेतृत्व एकलौटी रुपं न्ह्याः वंसाः बामलाःगु लिच्वः भोगे यायेमाःगु ख्याच्वः बियादीगु खः ।
राजनीतिक गतिरोधया सन्दर्भय् नेतृत्वया नीति असफल जुइधुंकूगु व थःगु पार्टीया नेता व मन्त्रीयात कुटपिट जुसां नं माओवादीया कुंखिने मफुगु धासें प्रधानमन्त्री नेपालं मुँज्याय् नेतृत्वया तच्वयेकं आपत्ति प्वंकूगु खः ।
मुँज्याय् प्रधानमन्त्री नेपालं विश्व परिवेश व लोकतन्त्रया सुदृढीकरणया निंतिं कांग्रेसनाप सहकार्य यायेमाःगु तर ल्वाभः सहितया माओवादीया नेतृत्व स्वीकार यायेमुइगु स्पष्ट यायेवं मुँज्याय् स्पष्ट निगू धार खनेदुगु खः ।
मुँज्या लिपा प्रधानमन्त्री नेपालं माओवादीयात विशेष अधिवेशन सम्बन्धी प्रस्ताव लितकायेत इनाप यायेगु व माओवादी ल्यूने मवंसाः विपक्षय् मतदान यायेगु धयादिल ।
उखे एमाले नायः झलनाथ खनालं धाःसा थ्वस्वयां न्ह्यः केन्द्रिय समितिं याःगु निर्णय संसदीय दलं पारित याःगु व एमाले थःगु निर्णयलय् अडिग दुगु स्पष्ट यानादिल ।
