आः हे थःगु सामान नेपाःयात बीत थाकू : अनमिन
नेपाः स्थित राष्ट्रसंघीय राजनीतिक मिसन अनमिनं नेपाल त्वःतिगु वा म्याद तनीगु विषयस विवाद जुयाच्वंगु इलय् अनमिनं आः हे थःगु उपकरण व भौतिक सामान नेपालयात बीत थाकुइगु खँ धाःगु दु ।
अनमिन प्रमुख करिन लनग्रेनं थौं प्रधानमन्त्री माधवकुमार नेपालयात नापलानाः तत्काल अज्याःगु सामान अनमिनं नेपाः त्वतेवं लःल्हायेत थाकुइगु धासें तत्काल नेपाल सरकारयात हस्तान्तरण मयायेगु स्पष्ट यानादीगु खः । थ्वस्वयां न्ह्यः नेपाल सरकारं उगु सामान लःल्हायेगु निंतिं पौ छ्वःगु धाःसां प्रक्रिया खुले याःगु मजूनी ।
नापलाय् ज्याय् लनग्रेनं अनमिनया गाडी, सिविरय् जडान यानातःगु क्यामेरा व शिविरय् तयातःगु भौतिक सामान सरकारयात लःल्हायेगु प्रक्रियाबारे जानकारी ब्यूगु खः । तर अनमिनं छ्यलाः वयाच्वंगु भौतिक सामान ग्वाहालि स्वरुप सरकारयात बीगु बारे सरकारं अनमिनयात लिबाक जक पौ छ्वःगु धासें स्वलाः लिपा अज्याःगु सामान
ग्वाहालि स्वरुप बीफइगु धाःगु दु ।
थ्वहे दथुइ थौं च्वगुं नेपाली कांग्रेसया अनौपचारिक मुँज्यां अनमिनया बहिर्गमन लिपा शान्ति प्रकि्रया अनुगमनया निंतिं अनमिनया विकल्प तयार यायेमाःगु बिचाः सार्वजनिक याःगु दु ।
थौं सुथय् कांग्रेस सभापति सुशील कोइरालाया महाराजगञ्ज स्थित छेँय् च्वंगु मुँज्यां आनमिनया बहिरगमन लिपा रिक्तता जुइमबीत माओवादी लडाकुयात विशेष समितिया मातहत हयाः समिति पाखें हे अनुगमन न्ह्याकेमाःगु निर्णय याःगु दु ।
कांग्रेसं उकीया निंतिं माओवादी सहमत जुसाः विशेष समितियात ग्वाहालि यायेत चिधंगु आकारय् अनमिन तयेफइगु धाःगु दु । तर लडाकु विशेष समितिया मातहतय् हयेत माओवादी तयार मजुसाः राजनीतिक सहमति मजुइगु व अनमिनया म्याद थपया निंतिं मंकाः पौ छ्वये मज्यूगु धासें कांग्रेसं अनमिनया म्याद थपया सम्भावना मदुगु नं स्पष्ट याःगु दु ।
