त्रिचन्द्रय् हानं अखिल व नेविसंघ दथुइ ल्वापु

त्रिचन्द्र क्याम्पसय् सत्तारुढ नेकपा (एमाले) व नेपाली कांग्रेसया विद्यार्थी संगठनत अनेरास्ववियु व नेपाल विद्यार्थी संगठन दथुइ हानं ल्वापु जूगु दु ।

छुं दिं न्ह्यः जक नेवि संघया कार्यकर्तातय्सं अखिलया वीरेन्दं रावतया ल्हाः पाला ब्यूगु विषययात कयाः हे थौं सुथय् हानं ल्वापु जूगु खः । ल्वापुइ लानाः निगूलिं विद्यार्थी संगठनया ३/३म्ह घाःपाः जूगु दु ।

अखिलं थः विद्यार्थी नेता रावतया ल्हाः पाला ब्यूम्ह वीरेन्द्र गिरी विरुद्ध प्रहरीलय् उजुरी तःसां कारवाही मयाःगु धासें प्रदर्शन यानाच्वंगु इलय् निगू विद्यार्थी संगठन दथुइ ल्वापु जूगु खः । ल्वापु लिपा प्रहरीं नेवि संघया सुरेशकुमार यादवयात ज्वना यंकूगु दुसाः अखिलं थः कार्यकर्तायात आक्रमण याम्हेसित मज्वंसाः मसाल जुलुस पिथनेगु व उकत्यका बन्द यायेगु तकं ख्याच्वः ब्यूगु दु ।