'खनालयात प्रम दयेकेगु निजी बिचाः'
येँ (सन्ध्या टाइम्स)/एकीकृत माओवादीं एमालेया अध्यक्ष झलनाथ खनालयात प्रधानमन्त्री दयेकेगु धकाः पार्टीया छुं छुं नेतातय्सं न्ववानाच्वंगु खँ वय्कःपिनिगु निजी बिचाः खः, पार्टीया अधिकारिक धापू मखु धकाः स्पष्ट याःगु दु।
पार्टी अध्यक्ष प्रचण्डया निवास नयाँबजारय् थौं सुथय् च्वंगु स्थायी समितिया बैठक लिपा थ्व खँ पित बिउगु खः। बैठकं माओवादीया हे नेतृत्वय् राष्ट्रिय सरकार दयेकेमाः धकाः निर्णय नं याःगु दु। स्थायी समितिया बैठक लिपा पार्टी उपाध्यक्ष नारायणकाजी श्रेष्ठं संचारकर्मीलिसे खँल्हासें थ्व जानकारी बियादीगु खः ।
वय्कलं पार्टीया छुं छुं नेतातय्सं एमालेया अध्यक्ष खनालयात प्रधानमन्त्री दयेकेत माओवादी तयार धकाः प्वंकूगु बिचाः वय्कःपिनिगु ब्यक्तिगत बिचाः जक खः धकाः नं स्पष्ट यानादिल ।
नेता श्रेष्ठं न्हूगु सरकार, शान्ति व संविधानया नितिं फुक्क हे विकल्पय् सहलह ब्याकेत तयार दु तर सरकार धाःसा माओवादीया हे नेतृत्वय् दयेकेमाः धकाः नं बः बियादिल।
माओवादी स्थायी समितिया दुजः देव गुरुङं म्हिगः छगू ज्याझ्वलय् न्ववासें एमाले अध्यक्ष खनालयात प्रधानमन्त्री दयेकेत माओवादी तयार दु धकाः न्ववानादीगु खः ।
