थौं ज्यापु दिवसया र्याली व सभा
थौं यःमरि पुन्हि
येँ (सन्ध्या टाइम्स)/थौं यःमरि पुन्हि। सामाज्या क्वचायेधुंकाः न्हूगु जाकि क्यलाः उकियात हे यःमरि दयेकाः नइगु न्हि। दछिया दुने दबलय् ताःहाकःगु चा अले दकलय् चीहाकःगु न्हि कथं नालातःगु यःमरि पुन्हियात नेवाःतय्सं नखःया रुपय् हना वयाच्वंगु दु। यःमरि पुन्हियात ज्यापु संस्कृति विकास कोषया आह्वानय् येँया परम्परागत त्वाःया ज्यापुतय्सं ज्यापु दिवसया रुपय् हनेगु याना वयाच्वंगु दु। ज्यापु दिवस धकाः सरकारं नं सार्वजनिक बिदा बियातःगु दु ।
थ्व हे लसताय् थौं सुथय् ज्यापु दिवस कंग अजिमा खलः कार्य व्यवस्थापन समिति यटखा त्वाःया ग्वसालय् यटखा लागां सांस्कृतिक झाँकी नापं छगू तःधंगु जुलुस पिहां वल। येँया परम्परागत थीथी ज्यापु त्वाःपाखें धिमे, बासुरी बाजं नापं ब्वति काःगु उगु सांस्कृतिक जुलुस येँया बसन्तपुली थ्यंकाः छगू सभाय् परिणत जूगु खः। उगु विशेष समारोहया मूपाहां प्रधानमन्त्री माधव नेपाल जुयादीगु खँ ग्वसाः खलकं धाःगु दु। उगु ज्याझ्वलय् ज्यापु प्रतिभा सम्मान, विशिष्ट व्यक्तित्व सम्मान, ज्यापु सेवा पदक, ज्यापुरत्न पदक व ज्यापु प्रज्ञा पदक लःल्हाइगु नं ग्वसाः दु ।
