दलितनाप स्वापू तःगुलिं गामं पितिन
येँ (सन्ध्या टाइम्स)/ कालिकोटय् दलित मिसालिसे यौन स्वापू तःगु द्वपनय् छगू हे गांया प्यम्ह मनूयात गामं पितिना छ्वःगु दु। जिल्लाया बदालकोट गाविसया कालिबहादुर बोगटीं छम्ह दलित मिसालिसे यौन स्वापू तयाः काय बुइकूगु धासें मचा बूगुया खुदँ लिपा वया पूरा परिवारयात हे गामं पितिउँगु खः ।
दलित मिसालिसे यौन स्वापू तइम्ह मनू गामय् च्वनाच्वन धाःसा गामय् द्यवं अनिष्ट याना बी धइगु ग्याःचिकुं उमित गामं पितिना छ्वःगु खः ।
गांयापिंसं कालिबहादुरया मांअबु नापं किजा व केहेँयात गामं पितिना छ्वःगु खः। कालिबहादुर धाःसा थौंकन्हय् भारतय् ज्या याः वनाच्वंगु दु। वया छेँजःपिं थौंकन्हय् कर्णाली खुसिया सिथय् च्वंगु रुच्का धाःगु थाय्या छगू गोठय् च्वनाच्वंगु दु ।
दलितपाखें मचा बुइवं कालि बहादुरया कलातं नं वयात त्वःताः वनेधुंकूगु दु। उखे कालिबहादुरं नं भारतय् मेम्ह हे मिसा ब्याहा यायेधुंकूगु खँ धाःगु दु।
मेखे गांयापिंसं धाःसा कालि बहादुर परिवारयात गामं पितिनागु मखुसें उमिगु बारे बुरापाकातय्सं बांमलाःगु खँ धयाहःगुलिं उमित गामं मचा तापाक तये यंकागु खः धकाः दावी याःगु दु ।
