माओवादी पाखें अनमिनया म्याद थप यायेगु प्रस्ताव
एकीकृत नेकपा (माओवादीं) नेपाः स्थित राष्ट्रसंघीय मिसन अनमिनया म्याद थप यायेगु प्रस्ताव तःगु दु ।
सिंहदरवार स्थित शान्ति मन्त्रालयलय् च्वंगु प्रमुख स्वंगू दलया मुँज्याय् माओवादीं उगु प्रस्ताव याःगु खःसां कांग्रेस व एमालें धाःसा उगु प्रस्तावयात अस्वीकार याःगु दु । माओवादीं विस्तृत शान्ति सम्झौताय् संविधान निर्माण व शान्ति प्रकृया क्वमचातले अनमिन नेपालय् च्वनीगु न्ह्यथनातःगु धासें अनमिनया म्याद थप यायेमाःगु धाःगु खः ।
कांग्रेस व एमालें धाःसा माओवादीया हे सहमतिलय् अनमिनया म्याद लिप्पांगु खुसी थप यायेधुंकूगु धासें आः हानं अनमिनया म्याद थप यायेगु आवश्यकता मदुगु खँ धाःगु दु ।
माओवादीया थौं सुथय् च्वंगु स्थायी समितिया मुँज्यां सरकारं जक अनमिनया म्याद लिप्पांगु खुसी थप यायेगु न्ह्यथंगु धासें अनमिनया म्याद थप यायेत दलत नाप सहलह यायेगु निर्णय याःगु खः ।
