ल्यँ दुगु ज्या आः संविधानसभा पाखें
संविधानसभाय् खनेदुगु विवादित विषयत ज्यंकेगु निंतिं गठन याःगु उच्चस्तरीय राजनीतिक कार्यदलया म्याद आः थप मयाइगु जूगु दु । कार्यदलया म्याद मतनीगु जुइवं ल्यँ दुगु विवादित विषयत ज्यंकेगु ज्या संविधानसभां हे याइगु जूगु दु ।
संविधानसभाय् दुथ्याःगु २७गू दलत दथुइ कार्यदलया म्याद तनेगु व मतेगु निर्णय यायेत थौं सिंहदरवारय् च्वंगु मुँज्यां कार्यदलया म्याद मतनेगु निर्णय याःगु खः । कार्यदलया म्याद थप मयाइगु जुइवं संविधानसभाया थीथी विषयगत समितियात सक्रिय यायेगु निर्णय दलतय्सं याःगु दु । माओवादी नायः पुष्पकमल दाहाल 'प्रचण्ड'या संयोजकत्वय् गठन याःगु कार्यदलया म्याद थप मयायेगु पक्षय् माओवादीं हे अडान काःगु खः ।
माओवादीं संविधानसभायात हे सक्रिय यानाः थुकीं हे विवादित मुद्दात ज्यंके माःगु खँ धाःगु खःसा कांग्रेस, एमाले लगायत दलत कार्यदलया म्याद थप यायेमाःगु पक्षय् खनेदुगु खः ।
