मजदूर दिवसय् शक्ति प्रदर्शन
१२० क्वःगु मई दिवस थौं नेपालय् नं थीथी पार्टी आवद्ध मजदूर संगठनतय्सं न्यायेकाच्वंगु दु । थौं माओवादी, एमाले, कांग्रेस सम्बद्ध मजदूरतय्सं सुथंनिसें थीथी थासं जुलुस पिकयाः थ्व दिवस हनाच्वंगु दु ।
माओवादी मजदूरतय्सं हनीगु मई दिवसया झ्वलय् थौं न्हिनय् येँया खुलामाचय् छगू सभा याइगु ज्याझ्वः दु । ज्याझ्वलय् प्रधानमन्त्री पुष्पकमल दाहाल 'प्रचण्डं' नं संवोधन यानादीगु ग्वसाः दु ।
मई दिवसया थ्व लसताय् आपालं मजदूरतय्सं पुचः पुचः जानाः जुलुस पिकयाच्वंगुलिं थौं स्वनिगःया सतकन्यंकं जुलुसया जुलुस वयाच्वंगु खनेदु ।
देशय् प्रधानसेनापतिया प्रकरण न्ह्याना-च्वंगुलिं माओवादी मजदूरतय्सं थौंया ज्याझ्वःयात शक्ति प्रदर्शनया रुप बीगु कुतः यानाच्वंगु दुसा उमिगु थ्व ग्वसाः सीकाः सुरक्षाया स्वंगुलिं अंग एलर्ट यानातःगु दु ।
