सुनाकोथिया मोहन महर्जन जापानय् 'ड्रागन'
जापानय् नेपाःमि कासामिया चर्चा
- चन्द्रमान महर्जन
यलया सुनाकोथिइ च्वंम्ह भाजु मोहन महर्जन जापानय् 'किक बक्सिङ' कासाय् 'ड्राइगन'या नामं परिचित जुयाच्वंगु दु ।
विश्वया दकलय् तःधंगु कासा कथं नालातःगु किक बक्सिङया 'के-वान' कासाया नितिं तकं वय्कः छनौट जुयादीगु दु। उगु कासा जापानय् दँय्दसं जुइ। विश्वया थीथी देय्या कासामित म्हितीगु कासा हे किकबक्सिङया 'के-वान'कासा खः ।
झिदँ न्ह्यः जापानय् थ्यंम्ह मोहन महर्जनं प्यदँत्या न्ह्यवंनिसें अन किक बक्सिङ कासा म्हितेगु शुरु यानादीगु खः। कासा म्हितेगु झ्वलय् ततःधंगु च्यागू कासा मध्ये प्यंगू कासाय् महर्जनं त्याकादीगु दुसा स्वंगू कासाय् पराजित जूगु नापं छगू कासाय् 'ड्र' जुयादीगु खः।
महर्जनया गुरु जापानयाम्ह हे भाजु रियू खः। जापानीज भाषां 'रियू' या अर्थ ड्रागन खः। गुरु रियूया तसकं यःम्ह शिष्य व तसकं बांलाक किकबक्सिङ म्हितीम्ह जूगुलिं मोहनयात जापानय् 'ड्रागन' धकाः हे म्हसीकेगु यानाच्वंगु दु ।
नेपालय् च्वनाः जापानीज भाय् सयेकूपिं मध्ये दकलय् बांलाःम्ह छम्हेसित जापान छ्वयेगु जापानीज दूतावासया ग्वसाः कथं जापान थ्यंम्ह भाजु महर्जन खास यानाः जापानय् आखः ब्वनेगु निंतिं धकाः वंम्ह खः। आः वय्कः अन हे च्वनाः नोकरी नं यानाच्वंगु दुसा फुर्सतया इलय् किक बक्सिङ कासा म्हितेगु याना वयाच्वंगु दु ।
वय्कलं धयादी, 'नेपालय् नं किक बक्सिङ कासा शुरु यानाः दँय् छम्ह नेपाःमियात किक बक्सिङया 'के-वान' कासाय् छ्वयेगु जिगु तःधंगु इच्छा दु ।'
