ज्यापु दिवसय् ज्यापु जिथिपिंत हनेज्या
येँ (सन्ध्या टाइम्स)/न्हय्क्वःगु ज्यापु दिवसया लसताय् मरुया महाद्यः पार्वती दबुली सछि व खुदँ दुम्ह मय्जु आशामाया प्रजापतियात हनेज्या जुल। श्रम तथा यातायात मन्त्री मोहमद अफताब आलम मूपाहां कथं झाःगु उगु ज्याझ्वलय् मय्जु प्रजापति नापं मेपिं खुम्ह ज्यापु समुदायया जिथिपिंत नं हंगु खः। उकी १०२ दँ दुम्ह मय्जु महर्जन, ९६ दँया ज्ञानमाया महर्जन, ९६ दँया नानीमैंया महर्जन, ९२ दँया कान्छी महर्जन, ९१ दँया नानीमय्जु डंगोल व ९० दँया रत्नमाया महर्जनयात हनेज्या याःगु खः। ज्याझ्वलय् साफ गेमय् स्वर्णपदक त्याकूम्ह विनिता महर्जन, मेम्ह स्वर्ण पदक बिजेता रामकृष्ण महर्जन व एशियाडय् काश्य पदक विजेता दिपक महर्जनयात नं हंगु खः ।
झी ज्यापु मिसा पुचः नरदेवीया ग्वसाः व ज्यापु दिवस समारोह समिति कंग अजिमा खलःया व्यवस्थापनय् जूगु उगु ज्याझ्वलय् मन्त्री आलमं नेवाःतय् संस्कृतिं नेपाःया पर्यटन व्यवसाय च्वन्ह्याकेत तिबः दइगु बिचाः प्वंकादिल। ज्याझ्वलय् सभासद् तीर्थराम डंगोल व नेवाः देय् दबूया नायः नरेश ताम्रकारं नेपाःया मौलिक संस्कृति संरक्षण यायेगु निंतिं मिसात हे न्ह्यज्यानाः ज्याझ्वः याःगुलिं लसता प्वंकादिल। खलःया नकिं छोरी महर्जनया सभापतित्वय् जूगु उगु ज्याझ्वलय् न्वकु सविता महर्जनं लसकुस यानादीगु खः ।
ज्याझ्वलय् योबहाः बासुरी खलः, ज्यापु संस्कृति विकास कोषया सांस्कृतिक कवः, सप्तक बैण्ड, डान्स कल्चरल आर्ट सेन्टरं सांस्कृतिक ब्वज्या न्ह्यब्वःगु खः। लिसें 'सितला मय्जुया सिनाज्या' पूधाःप्याखं नं क्यंगु खः। भरत महर्जनं च्वयाः प्रचण्ड मल्लं निर्देशन यानादीगु उगु प्याखनय् उगु इलय् तःकै वःपिं नेवाः मस्तय्त नेपालं पितिना छ्वःगु मार्मिक बाखं न्ह्यब्वयातःगु दु ।
