कास्मिरय् नेपाःमिया जग्गा ?
पिनें वईपं भारतीय नागरिकतय्सं हे जग्गा न्याये मी याये मदु धयातःगु काश्मिरय् छम्ह नेपाःमिं जग्गाया कारोवार यानाच्वंगु खँयात कयाः अन बबाल जूगु दु । नेपाःया छम्ह साधुं स्थानीय छम्ह मुस्मां नागरिकयात काश्मिरया केन्द्रय् लाःगु छकू जग्गा मिउगु घटना सार्वजनिक जुइवं अनया काश्मिरी पण्डित संघर्ष समितिया नायः मोल्भि अज्जद अहमदं अनया गभर्नर-यात छपु पौ च्वसें कास्मिरय् गैरकास्मिरीतय्सं जग्गा न्याये मी याये मदु धइगु संवैधानिक व्यवस्था दुसां छम्ह गैर भारतीयं हे थन जग्गा मीगु ज्या यात धकाः उजुरी समेत तःगु खः । थुकिं यानाः कास्मिरय् कानून छले यानाः जग्गा न्याये मी याईपं भूमाफियात सकि्रय जुयाच्वंगु खने दत धकाः नं सचेत यानातःगु दु ।
जग्गा मिउगुलिं फाँसी
उखे प्यालेष्टाइनय् थःगु जग्गा इजरायलीतय्त मिल धकाः छम्ह प्यालेष्टिनीयात मृत्युदण्डया सजाय बिउगु दु । स्थानीय अनवत ब्रेइतं गाजा पट्टिया थःगु जग्गा छम्ह इजरायलीयात मिउगु खः ।
