ज्यापु दिवसया पत्रकार सम्मेलन
येँ (सन्ध्या टाइम्स)/ज्यापु दिवस ताःलाक हनेत राष्ट्रिय ज्यापु दिवस समारोह समितिं थन छगू पत्रकार सम्मेलन यात। ज्यापु संस्कृति विकास कोषया नायः चक्रमान डंगोलया सभापतित्वय् जूगु पत्रकार सम्मेलनय् सन्तकुमार महर्जनं प्रेस विज्ञप्ति ब्वनाः न्यंकूगु खः ।
कंग अजिमा त्वाःया नायः पूर्ण नारायण महर्जनं ज्यापु दिवसय् जुइगु थीथी ज्याझ्वः बारे कनादिलसा सभासद् तीर्थराम डंगोलं आर्थिक क्रान्ति बिना राजनीतिक क्रान्ति सम्भव मदु धासें पर्यटन वर्ष २०११ ताःलाकेत आदिवासी भूमिपुत्रतय् थ्व सांस्कृतिक ज्याझ्वलं आपालं तिबः बीगु बिचाः प्वंकादिल ।
न्हय्क्वःगु ज्यापु दिवस पुस ६ गते थीथी ज्याझ्वः यासें हनीगु ग्वसाः दु। अन इना बिउगु प्रेस विज्ञप्तिइ राजधानीबासीया हैसियतं ज्यापु समुदायया भूमिका तसकं महत्वपूर्ण व चुनौतिपूर्ण जूगु न्ह्यथँसें ज्यापु जातिया पहिचान व अधिकारया निंतिं संगठित जुयाः न्ह्यज्यायेत २०६१ सालंनिसें ज्यापु दिवस हनेगु याना वयाच्वंगु खँ न्ह्यथनातःगु दु ।
