अनमिनया म्याद हानं थप यायेमाः : माओवादी
एकीकृत नेकपा (माओवादीं) नेपाः स्थित अनमिनया म्याद हानं थप यायेमाःगु निर्णय याःगु दु । माओवादीया थौं च्वंगु स्थायी समितिया मुँज्यां शान्ति प्रकृया पूमवंकं अनमिनयात लितछवयेगु पाय्छि मजुइगु धासें हानं म्याद थपया निंतिं दलत नाप सहलह यायेगु निर्णय याःगु दु ।
माओवादी नायः पुष्पकमल दाहाल 'प्रचण्ड'या न्हू बजार स्थित छेँय् च्वंगु मुँज्यां संविधानसभाया विवादित विषयत ज्यंकेत गठन याःगु उच्चस्तरी राजनीतिक कार्यदलया म्याद थप मयायेगु निर्णय नं याःगु दु । माओवादीं संविधानसभा स्वयां नं राजनीतिक दलत संविधान निर्माणय् हावी जूगु धासें संविधानसभायात हे सक्रिय यायेत नं कार्यदलया म्याद थप याये मज्यूगु धाःगु दु ।
'उच्चस्तरीय कार्यदलं संविधानसभाया ६०१म्ह सभासदतय्त ज्या बिहीन यानाच्वंगु दु' प्रवक्ता दिनानाथ शर्मा धयादिल, 'आः संवैधानिक समिति व संविधानसभा अन्गर्तया थीथी समितियात सक्रिय यायेमाः ।'
अथेहे माओवादीं वाईसीएलया अर्ध सैन्य संरचना मदुगु खँ धाःगु दु । 'यदि सैन्य संरचना दुसाः उकीयात तुरुन्त भंग यायेत तयार दु' प्रवक्ता शर्मां धयादिल ।
