माओवादी पाखें प्रस्ताव लितकायेत अस्वीकार
एनेकपा (माओवादीं) विशेष अधिवेशनय् सहलह यायेत दर्ता याःगु निगू प्रस्ताव लितकायेत अस्वीकार याःगु दु । सत्तारुढ नेकपा (एमाले) व नेपाली कांग्रेसं माओवादीयात प्रस्ताव लितकायेत इनाप याःसां माओवादीं थःपिंसं दर्ता याःगु प्रस्तावय् सहलह जुइमाःगु अडान काःगु खः ।
सिंहदरवारस्थित शान्ति मन्त्रालयलय् थौं सुथय् स्वंगू दलतय् मुँज्याय् कांग्रेस व एमालें प्रस्ताव लितकायेमाःगु पक्षय् अडान काःगु खःसां माओवादीं लितमाकायेगु थःगु हे अडानय् अडिग जुइवं मुँज्या निष्कर्षबिहीन जूगु खः ।
माओवादी लगायत चिधंगु खुगू दलं राष्ट्रपति समक्ष विशेष अधिवेशनया निंतिं समावेदन दर्ता यायेवं राष्ट्रपति डा. रामवरण यादवं विशेष अधिवेशन आव्हान यानादीगु खः । माओवादीं उगु अधिवेशनय् सहलह यायेमाःगु धासें निगू प्रस्ताव संसदीय सचिवालयलय् दर्ता याःगु खः ।
माओवादीं संसद नियमावली संशोधन यायेमाःगु व प्रधानमन्त्रीया निर्वाचन न्हूगु ढंगं सुरु यायेमाःगु प्रस्ताव दर्ता याःगु खः ।
