'संविधानसभा जनताया मिखाय् पंगु जुजुं वनाच्वंगु'

एकिकृत नेकपा माओवादीया न्वकू डा. बाबुराम भट्टराईं दलतय्गु सत्तामोह व लोभया कारणं संविधान सभा जनताया मिखाय् पंगु जुजुं वनाच्वंगु खँ धयादिल ।

थौं येँया बालाजुइ ग्वसाः ग्वःगु छगू ज्याझ्वलय् न्ववानादिसें न्वकू डा. भट्टराईं राजनीतिक स्थायित्व जुइमफूगु कारणं प्रतिगमनकारीतय्सं छ्यं ल्ह्वनाहःगु खँ धयादिल ।

राष्ट्रिय व राष्ट्रवादया नामय् पुलांम्ह युवराज पारसं चितवनय् कयेकूगु गोलि प्रतिगमनया अवशेष जूगु खँ डा. भट्टराईं पारस आः राष्ट्रवादया गां न्ययाः नायः जुइत्यंगु खँ धयादिल । नापं वय्कलं दलतय्गु खिचातानीया कारणं प्रतिगमनं छ्यं ल्ह्वनेत स्वःगु नं द्वपं बियादिल । यदि दलतय्गु खिचातानीया अन्त्य मजूसा देय् मखुगु दिशाय् वनीगु खँय् सचेत यानादिसें मू मू राजनीतिक दलतय्सं थुखेपाखे बिचाः यायेमाःगु खँय् बः बियादिल ।