माओवादी व कांग्रेसं बिस्कं बिस्कं ह्वीप जारी
एनेकपा (माओवादीं) राष्ट्रपति डा. रामवरण यादवं पुस ४ गतेया निंतिं आव्हान यानादीगु विशेष अधिवेशनय् पार्टीया फुक्कं सभासदतय्त उपस्थित जुइत ह्वीप जारी याःगु दु । थौं च्वंगु माओवादीया संसदीय दलया मुँज्यां उगु ह्वीप जारी यायेगुया नापं थःगु पार्टीं दर्ता याःगु प्रस्तावय् मेमेगू दलतय्त सहमत याकेत पहल यायेगु निर्णय नं याःगु दु ।
अथेहे माओवादीं दर्ता याःगु निगू प्रस्तावया विपक्षय् मतदान यायेत नेपाली कांग्रेसं थःगु सभासद्तय्त ह्वीप जारी याःगु दु । कांग्रेस संसदीय दलया नं थौं हे च्वंगु मुँज्यां उगु ह्वीप जारी याःगु खः ।
उखे सत्ता साझेदार दलतय्सं माओवादीं म्हिग संसदीय सचिवालयलय् दर्ता याःगु निगू प्रस्ताव लितकायेत इनाप याःगु दु । थौं प्रधानमन्त्री निवास बालुवाटारय् च्वंगु सत्ता साझेदार १४गू दलया मुँज्यां माओवादी प्रस्ताव बारे सहलह यायेधुंकाः अज्याःगु इनाप याःगु खः ।
