पारस येँय् लिहांवल, कन्हय् पत्रकार सम्मेलन

पुलांम्ह युवराज पारश शाह न्यान्हु लिपा येँय् लिहां झाःगु दु । वंगु शनिवाः बहनी रुबेल चौधरीयात चितवनय् गोलीं क्येकेवं मंगलवाः प्रहरीं ज्वनायंकूम्ह शाह थौं पोखरां येँय् लिहांवःगु खः । स्वन्हु तक प्रहरी हिरासतय् दुम्ह पारस म्हिग झिद्वः धरौटी पुला रिहा जुइवं पोखरा लिहावंगु खः ।

फिस्टेलया हेलिकप्टरं थौं येँय् थ्यंकूम्ह पारशयात लसकुस यायेत विमानस्थलय् आपालं जुजुवादीतय् उपस्थिति दुगु खः । उगु इलय् अनया सुरक्षा व्यवस्था नं तसकं कडा याःगु खः । येँय् लिहांवयेवं निर्वल निवास थ्यंकूम्ह पारसं विमानस्थलय् छुं प्रतिक्रिया बियामदी । शाहं कन्हय् शनिवः पत्रकार सम्मेलन मार्फत थःगु खँ धायेगु जानकारी ब्यूगु दु ।

थ्वस्वयां न्ह्यः थौं सुथय् पोखराय् पत्रकार सम्मेलन यायेगु धाःगु खःसां उगु सम्मेलन विशेष लिछ्याःगु खः ।