खुलाया कार्ययोजना दयेकीगु
माओवादीया थनिंनिसें बैठक
येँ (सन्ध्या टाइम्स)/गोर्खाया पालुङटारया विस्तारित बैठकया म्यान्डेट कथं खुलाया नितिं कार्ययोजना दयेकत एकीकृत माओवादीया थनिंनिसें केन्द्रीय कमिटीया बैठक शुरु जूगु दु ।
स्वंगू 'स' कथं सदन, सरकार व सतकय् न्हूगु संविधान व शान्तिया नितिं दबाबमूलक ज्याझ्वः याना वनेगु व षडयन्त्र जुल धाःसा जनविद्रोह यायेगु पालुङटारया बैठकया म्यान्डेटया लिधंसाय् केन्द्रीय कमिटीया बैठकं खुलाया नितिं कार्ययोजना दयेकी धकाः माओवादीया छम्ह नेतां धयादीगु दु। पालुङटार बैठकं 'अभिव्यक्तिइ स्वतन्त्रता, कामकारवाहीइ एकरुपता'या अभ्यास याःगु जुयाः आः माओवादीं न्हूगु कार्ययोजना हइबलय् उकियात कार्यान्वयन यायेत फुक्क नेता व कार्यकर्तात न्ह्याः वनीगु नापं पार्टी दुने मिलेमजूगु सैद्धान्तिक खँयात बैठक, भेला व माल धाःसा अधिवेशन तकं यानाः ज्यंकीगु माओवादीया नेतां धयादीगु दु ।
थुगुसीया बैठकं देशभक्त व गणतन्त्रवादीतय्गु मंकाः मोर्चा दयेकाः ल्वानावनेगु नापं विद्रोहया नितिं तयारीया विषयय् नं सहलह जुइ धकाः धाःगु दु। केन्द्रीय कमिटीया बैठकं स्वंगू दस्तावेजय् मिलेजूगु खँ दुथ्याकाः छगू हे दस्तावेज तयार याइगु अले उगु हे दस्तावेज पार्टीया आधिकारीक दस्तावेज जुइगु नापं ल्यंदुगु खँ बैठक, भेला व अधिवेशन यानाः क्वचायेकी धकाः नं धाःगु दु ।
