क्यान्सरं बचे जुइगु उपायबारे प्रदर्शनी
ख्वप (सन्ध्या टाइम्स)/नेपाल अर्बुद रोग निवारण संस्था ख्वप शाखाया गुक्वःगु तःमुँज्या आः नकतिनि ख्वपय् जुल। संस्थाया केन्द्रीय अध्यक्ष लोकेन्द्र बहादुर श्रेष्ठ(ईश्वर) मूपाहां कथं झाःगु उगु ज्याझ्वलय् नेपाल अर्बुद रोग निवारण संस्था ख्वप जिल्ला शाखाया अध्यक्ष श्रीधर राइठोरया सभापतित्वय् जूगु खः। उगु ज्याझ्वलय् न्ववानादिसे मूपाहां श्रेष्ठं क्यान्सर ल्वय्या लागिं सक्रिय ग्वाहालि याना वयाच्वंगु ख्वप जिल्लां वइगु दिनय् नं उकथं हे ज्वःमदुगु योगदान यानाः क्यान्सर ल्वगितय्गु उद्धारया लागिं ग्वाहालि याइगु आशा प्वंकादिल। ख्वप क्यान्सर अस्पतालया मेडिकल सुपरिटेण्डेण्ट डा. सुदिप श्रेष्ठं विश्वब्यापी रुपं न्यनाच्वंगु क्यान्सर ल्वय् नियन्त्रण यायेत सामाजिक संघ संस्थाया नं तःधंगु हे भूमिका दइगु खँ कनादिल ।
ज्याझ्वलय् क्यान्सर ल्वचं बचे जुइगु थीथी उपायया बारे प्रदर्शनी नं जूगु खः। संस्थाया उपाध्यक्ष विवेकमान कर्माचार्यं लसकुस यानाः न्ह्याकूगु गुक्वःगु तःमुँज्याय् शाखाया दुजः यज्ञलक्ष्मी प्रधान सुभाय् देछायादीगु खः। उगु तःमुँज्याया बन्द सत्रं सचिव लम्बोदर राठोरं न्ह्यब्वयादीगु प्रगति प्रतिवेदन पारित याःगु खः। अथेहे कोषाध्यक्ष केदार त्वाय्नाबासुं न्ह्यब्वयादीगु आर्थिक वर्ष २०६६/६७ या आर्थिक प्रतिवेदन नं पारित याःगु खः। ख्वपय् नेपाल अर्बुद रोग निवारण संस्था अन्तर्गत न्यादँ न्ह्यवंनिसें राष्ट्रिय स्तरया क्यान्सर अस्पताल संचालनय् वयाच्वंगु दु ।
