नेपाः देय् व जनताया लागि चितवन घटना हाकनं याये : पारस

झिद्वः दां धरौटी व फागुण १९ गतेया साधारण तारेखय् रिहा जूम्ह पूर्वयुवराज पारसं नेपाः देय् व जनताया लागि चितवन घटना हाकनं यायेगु खँ पत्रकारतय्त धयादीगु दु ।

चितवनं रिहा जुया पोखराया फिस्टेल लजय् च्वनेत पोखरा वंम्ह शाहं थ्व खँ धयादीगु खः । चितवनय् थःत प्रहरीं ज्वंगु मखुसे थः हे वनागु खँ धयादीगु दु । चितवनय् थः हेलिकप्टर चार्टर्ड याना वनागु व हेलिकप्टरया भाडा थःम्हेसिनं पुलागुलिं थःत ज्वंगु मखुगु धयादीगु दु । जिं पोखराय् पासापिंत थः पोखराय् तुं लिहां वये धयातयागुलिं थःगु वचं पूवंकेत पोखरा वयागु व कन्हय् येँय् वनेगु धयादीगु दु ।

पारस रिहा जुइवं चितवनय् समर्थकतय्सं तःजिक लसकुस याःगु खःसा पोखराय नं जुलुस पिकाःगु दु । अथेहे येँय् नं बहनी मशाल जुलुस पिकाःगु खःसा जुलुसय् सरकार विरोधी नारा थ्वयेकूगु खः ।

बसन्तपुलिं पिकाःगु मशाल जुलुस नगरया थीथी थाय् चाःहिलाः उपप्रधानमन्त्री व परराष्ट्र मन्त्री सुजाता कोइराला व वय्कःया जिलाजं रुवेलया पुतला नं च्याकूगु दु ।

येँय् निषेधित थाय् या घोषणा
चितवनं पारस शाह रिहा जुइवं येँय् सम्बेदनशील थासय् सरकारं निषेधाज्ञा जारी याःगु दु । येँ जिल्लाया सुरक्षा संवेदनशीलतायात ध्यानय् तया बि.सं.२०६७ साउन ३ गते आदेश कथं येँ महानगरपालिकाया क्वय् न्ह्यथना कथंया थासय् स्थानीय प्रशासन ऐन २०२८ या दफा ६ (३) कथं कायम जूगु निषेधित थासय् मेगु सुचं मयाःतले थौं २०६७ पुष १ गतेया उजं कथं यथावत जूगुलिं क्वय् न्ह्यथना तःगु निषेधित थासय् धर्ना, जुलुस, र् याली, कोणसभा, आमसभा यायेगु निषेध याःगु सर्वसाधारणया जानकारीया लागि सुचं ब्यूगु दु । थुगु सुचंयात वास्ता मयाःसें छुं नं कथंया ज्याझ्वःयात धाःसा नियमानुसार कारवाही जुइगु नं धाःगु दु ।

निषेधित थाय् त
१. राष्ट्रपतिया ज्याकूया लुखासं उत्तर दक्षिण ५० मिटर
२. उपराष्ट्रपतिया ज्याकूया न्ह्यःने च्वंगु कम्पाउण्ड
३. प्रधानमन्त्री निवास बालुवाटार
४. भद्रकाली देगः, रिपुमर्दन पेट्रोलपम्प न्ह्यःने तक
५. माइतीघर मण्डलानिसें सिंहदरवार दक्षिण गेट जुया हनुमानस्थान तक
६. संविधानसभा भवनया पश्चिम गेटनिसें नयाँ बानेश्वर चुकतक
७. माइतीघर मण्डलानिसें पद्मोदय स्कूल तक ।