पारसयात त्वःतेत माग यासें थीथी थासय् प्रदर्शन
चितवन स्थित टाइग टप्स होटलय् उपप्रधानमन्त्री सुजाता कोइरालाया जिलाजं रुवेल चौधरीयात वंगु शनिवाः बहनी गोलीं क्येकूम्ह पुलांम्ह युवराज पारस शाहयात त्वःतेत माग यासें थौं देय्न्यंक प्रदर्शन जूगु दु ।
पारसया समर्थनय् येँय्या थीथी थासय् सुथंनिसें जुलुस पिहांवःगु खः । थीथी थासय् टायर च्याकेगु व पसः बन्द यायेत स्वःपिंत प्रहरीं नियन्त्रणय् काःगु खः । चप्पल कारखाना पिने नारा जुलुस सहित टायर च्याकाः सतक अवरुद्ध यायेत स्वपिं ८म्हेसित प्रहरीं नियन्त्रणय् काःगु दु ।
प्रहरीं राप्रपा नेपाल येँ शाखाया नायः पशुपति खड्का, विनयराज शाक्य, महेन्द्र गुरुङ नापं राष्ट्रिय एकता पार्टीया नायः शरदचन्द्र दाहाल, राष्ट्रिय सरोकार मञ्चया केन्द्रीय दुजः सोम विक्रम सिंह, राजकुमार थापालगायतयात ज्वनाः महाराजगंज स्थित प्रहरी प्रभागय् यंकूगु खः ।
अथेहे क्षेत्रपाटीइ पसः बन्द याकेत स्वःपिं ३म्हेसित व बसन्तपुली नारा जुलुस यानाः सतक अवरोध यायेत स्वःपिं ८म्हेसितं नं प्रहरीं ज्वंगु दु ।
उखे बर्दिया, वीरगञ्ज, चितवन, धनगढी, दोलखा लगायत थासय् नं पारसयात ज्वंगु विरोधय् प्रदर्शन जूगु दु । थौं जुजुवादीतय्सं बर्दिया बन्दया आव्हान याःगु खःसा वीरगञ्जय् विश्व हिन्दु युवा संघ, राष्ट्रिय सरकोकार मञ्च व शिवसेना नेपालं बन्द याःगु दु । राप्रपा नेपालं थौं चितवन बन्दया आव्हान याःगु खःसां न्हिय् १ बजे लिपा बन्द लितकाःगु खः ।
