थारु आन्दोलन दुने वःगु खतरा
देय्न्यंकं उथलपुथल जुइ कथं थारु समुदायं न्ह्याकाच्वंगु आन्दोलनयात समाप्त याये कथं अन दुने चलखेल शुरु जुया वःगु संकेत पिहां वःगु दु । थारु आन्दोलनया छम्ह न्ह्यलुवाः राजकुमार लेखीयात अपहरणया कुतः यात धइगु द्वपं बियाः थारु आन्दोलनया हे मेम्ह न्ह्यलुवाः लक्ष्मण थारुयात ज्वनेगु व कुनेगु ज्या जूगुलिं च्वन्ह्याना वनाच्वंगु थारु आन्दोलनयात स्यंकेगु लागिं चलखेल शुरु जुया वःगु आभास पिहां वःगु दु ।
थारु नेता लेखीयात अपहरणया कुतः जक याःगु खः अपहरण हे याःगु मखु । थज्याःगु अस्पष्ट ज्याखँया द्वपं थःगु संघर्षया मेम्ह न्ह्यलुवाःयात बीगु ज्यां संघर्ष दुने अनावश्यक शंका उपशंका ब्वलंकाः आन्दोलनयात हे क्षतविक्षत याना बीगु सम्भावना दु । थज्याःगु ज्या थारु नेतात थःपिंसं हे याःगु मखुसां वय्कःपिंत लिउने च्वनाः मेपिं सुनां ग्वाकाच्वंगु नं दयेफु । थुकी वय्कःपिंसं बिचाः यायेमाःगु आवश्यकता दु ।
थौं थारु आन्दोलन दुने पिहां वःगु समस्यापाखें मेमेगु जातीय आन्दोलनकारीतय्सं नं शिक्षा कायेमाःगु आवश्यकता दु । आः दयेकीगु न्हूगु नेपाः धइगु सदियौंनिसें उत्पीडनया शिकार जुया वयाच्वंपिं जनजाति व दलिततय् निंतिं अनुकुल नेपाः खः । उकिं हे थ्व उत्पीडित समुदायं संघर्ष यानाच्वंगु दु । तर उमित अज्याःगु अवस्था मवयेकेगु लागिं उमिसं यानाच्वंगु आन्दोलन दुने थुकथंया शंका उपशंकाया वातावरण ब्वलंकाः जातीय आन्दोलनयात दुनें हे मदयेका छ्वयेगु षडयन्त्र याइगु खतरा
दु । उकिं हरेक जातीय आन्दोलनकारीतय्सं थारु आन्दोलनय् वयाच्वंगु थ्व समस्या प्रति बिचाः यायेमाःगु आवश्यकता दु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
