१०क्वःगु सार्क व्यापार मेला सुरु
१०क्वःगु सार्क व्यापार मेला थनिंनिसें येँया भृकुटीमण्डपय् सुरु जूगु दु । 'व्यापारया माध्यमं क्षेत्रीय प्रगति' धइगु नारा सहित थुगु मेला सुरु जूगु खः ।
मेलया उलेज्या यानादिसें प्रधानमन्त्री माधवकुमार नेपालं मेला सार्क राष्ट्रत दथुइ क्षेत्रीय व्यापार लगानी अभिवृधि व पर्यटन व्यवसाय अप्वयेकेत महत्वपूर्ण जुइगु विश्वास प्वंकादिल । प्रधानमन्त्री नेपालं मेलां सार्क राष्ट्रत दथुइया स्वापू, संस्कृति व सहकार्ययात अप्वयेकेत ग्वाहलिइ याइगु नं धयादिल ।
क्षेत्रीय व्यापार विस्तार लगानी अप्वयेकेगु व पर्यटन प्रर्वद्धनया यायेगु ताः तयाः ग्वसाःग्वःगु मेलाय् थीथी देय्या व्यवसाय सम्बन्धी २९६ व नसाःया नापं पर्यटन प्रर्वद्धनाया ८-८ स्टल यानाः मुक्कं ३१२ स्टलत तयातःगु दु ।
मेलाय् बंगलादेशी कम्पनीया ६०, भारतया ४१, श्रीलंकाया ५, भुटानया २०, पाकिस्तानया २८ व नेपाःया १४२ स्टलत दु । माल्दिभस व अफगानीस्थानं धाःसा व्यवसायीक स्टल मतसें पर्यटन प्रर्वद्धनमुलक स्टल जक तःग दु ।
