थौं स्वसःगू थासय् भोक हड्ताल
येँ (सन्ध्या टाइम्स)/लिम्बुवान स्वायत्त प्रदेशया माग यानाः संघीय लिम्बुवान राज्य परिषद्या आह्वानय् थौं सुथंनिसें लिम्बुवानया लागाया थीथी ३०० गू थासय् सलंसःम्ह लिम्बुवानवासीतय्सं भोक हड्ताल शुरु याःगु दु। भोक हडतालय् मिसामिजं, मचांनिसें बुराबुरितय्सं तकं ब्वति कयाच्वंगु खँ परिषदं धाःगु दु ।
न्हूगु संविधानय् आत्मनिर्णयया अधिकार नापं लिम्बुवान स्वायत्त राज्यया नितिं निर्णायक आन्दोलन यायेगु झ्वलय् थौं सुथय् ६ बजेनिसें १२ घण्टे भोक हड्ताल यानाच्वंगु खः ।
अरुण पूर्वया ९ जिल्लायात लिम्बुवान स्वायत्त प्रदेश दयेकेमाःगु माग यासें आन्दोलन याना वयाच्वंगु लिम्बुवान राज्य परिषदया आह्वानय् इटहरी, मोरङ, झापा, धनकुटा नापं थाय्थासय् थ्व भोक हडताल यानाच्वंगु दु।
परिषद्या अध्यक्ष कुमार लिङदेनं धरानय्, महासचिव सूर्य माखिमं इटहरीइ, ज्ञानबहादुर गुरुङं मोरङय्, ज्ञानु इम्वङं झापाय्, चन्द्रसिं नेम्वाङं धनकुटाय् भोक हड्तालया नेतृत्व यानाच्वंगु दु ।
उगु परिषदं वंगु १४ गते मसाल जुलुस अले १५ गते लिम्बुवान बन्द आह्वान याःगु खः। अथे हे प्रत्येक महिनाया १४ गते मसाल जुलुस नापं १५ गते लिम्बुवान बन्द यायेगु घोषणा यानातये धुंकूगु दु। लिम्बुवान परिषदं जेष्ठ १४ गते तकया दुने लिम्बुवान स्वायत्त राज्य सहितया न्हूगु संविधान मवल धाःसा अनं लिपा समानान्तर सरकार दयेका वनेगु जुइ धकाः नं ख्याच्वः बियातःगु दु ।
