ज्यापु दिवसया सुकुन्दा र्याली
येँ (सन्ध्या टाइम्स)/राष्ट्रिय ज्यापु दिवस २०६७ व पर्यटन वर्ष २०११ ताःलाकेगु मूआज्जु ज्वनाः वंगु सोमवाः झ्वःछे मिसा पुचः' या ग्वसालय् सुकुन्दा र्याली यात। रक्षामन्त्री विद्या भण्डारी मूपाहां कथं झाःगु उगु सुकुन्दा र्याली मिसातय्गु अप्वः सहभागिता दुगु खः ।
उगु ज्याझ्वलय् मूपाहां मन्त्री भण्डारीं पर्यटन वर्ष २०११ ताःलाक हनेया निंतिं सरकारपाखें माःगु ग्वाहालि यायेगु बचं बियादीगु खः। राष्ट्रिय ज्यापु दिवसया ग्वसालय् न्ह्याःगु उगु ज्याझ्वलय् ज्यापु संस्कृति विकास कोषया नायः चक्रमान डंगोल, परम्परागत यट्खा त्वाःया नायः पूर्ण महर्जनपिंसं ज्यापु दिवसया विषयय् चर्चा यानादीगु खः। राष्ट्रिय ज्यापु दिवस झःझः धायेक हनेगु आज्जुं न्ह्याकूगु उगु सुकुन्दा र्याली यट्खा बाहालं न्ह्यानाः न्यत, क्षेत्रपाटी, ठमेल, ज्याथा, असं, वंघः, ओमबहाः, लगं, क्वहिति, भिंद्यःत्वाः, मरु जुयाः यट्खा बहालय् तुं वयाः क्वचाःगु खः। र्यालीइ मुक्कं निसःम्हेसिनं ब्वति काःगु खः ।
वकुन्हु हे सुथय् यट्खा बहालं छगू मोटरसाइकल र्याली नं न्ह्याकूगु खः। नागरिक उड्डयन तथा पर्यटन मन्त्री शरदसिंह भण्डारी मूपाहांकथं उपस्थित जुयाः ज्याझ्वःया उलेज्या यानादीगु उगु मोटरसाइकल र्याली टोखा, धर्मस्थली, बलम्बु, सतुंगः, मच्छेगां, थानकोट, किपू, बुंग, खोना, चाबही जुयाः यट्खा बहालय् तुं वयाः क्वचाःगु खः ।
