अनुसन्धानया निंतिं पारसया म्याद स्वन्हु थप
सार्वजनिक अपराध ऐन अन्तर्गत मुद्दा दर्ता ला:म्ह पुलांम्ह युवराज पारस शाहयात अनुसन्धानया निंतिं स्वन्हुया म्याद थप याःगु दु । प्रहरीं अनुसन्धानया निंतिं म्याद थप यायेत माग याःगु कथं जिल्ला प्रशासन ज्याकू चितवनं थौं स्वन्हुया म्याद थप याःगु खः ।
थ्वहे दथुइ थौं सुथय् जिल्ला प्रशासन अधिकारी बसन्तराज गौतमं पारसनाप बयान काःगु दु । पारसयात जिल्ला प्रशासन ज्याकूथी यंकाः बयान कायेगु धाःगु खःसां लिपा प्रमुख अधिकारी गौतम हे भरतपुर तालिम केन्द्रय् वयाः बयान काःगु खः ।
अथेहे येँय् नं वंगु छानबिन समितिया दुजःतय्सं नं पारसनाप बयान काःगु दावी याःगु दु । तर बयानय् पारसं छु धाल धइगु बारे स्पष्ट मजुनी ।
उखे पारसं चितवन स्थित टाइर टप्सय् गोलीं कयेकूम्ह उपप्रधानमन्त्रीया जिलाजं रुबेल चौधरीयात प्रहरीं येँय् हे बयान कायेगु तयारी यानाच्वंगु दु । बयानया निंतिं चितवन प्रहरीं चितवन वयेत याःगु रुबेलं इनाप अस्वीकार याःगु खः ।
