अखिल क्रान्तिकारीया न्हूम्ह नायः हिमाल शर्मा
एकीकृत नेकपा (माओवादी) निकट विद्यार्थी संगठन अनेरास्ववियु क्रान्तिकारीलय् न्हूम्ह नायः कथं हिमाल शर्मा चयन जुयादीगु दु ।
येँया किपुली न्ह्यानाच्वंगु क्रान्तिकारीया १८क्वःगु राष्ट्रिय सम्मेलनं शर्माया नेतृत्वय् न्हूगु कार्य समिति चयन यासें क्वचाःगु दु । न्हूगु कार्यसमितिया न्वकूलय् जागृत रायमाझी, रमेश मल्ल व शरद रसाइली व मू छ्याञ्जेलय् विन्दमान विष्ट चयन जूगु दु ।
न्हूगु कार्यसमितिया न्वकू व मू छ्याञ्जेलय् चयन जूपिं फुक्कं माओवादी नायः पुष्पकमल दाहाल 'प्रचण्ड' पक्षधरयापिं खः । क्रान्तिकारीया नेतृत्व शर्मायात बीगु निर्णय पार्टी हेडक्वाटरं याःगु खःसां शर्माया नेतृत्वय् च्वनेत धाःसा नेतृत्वया प्रतिस्प्रधीत रामदीप आचार्य, युवराज चौलागाई व काचन खनाल च्वनेत अस्वीकार याःगु दु ।
थ्वस्वयां न्ह्यः माओवादी हेडक्वाटर, क्रान्तिकारी पदाधिकारी व विद्यार्थी इन्चार्ज नेत्रविक्रम चन्द 'विप्लव' दथुइ च्वंगु मंकाः मुँज्यां शर्मायात नेतृत्व बीगु निर्णय याःगु खः ।
