उच्चस्तरीय कार्यदल बेकार खः: निलाम्बर
येँ(सन्ध्या टाइम्स)/संविधान निर्माण यायेगु ज्याय् वयाच्वंगु पंगः चीकेगु ताः तयाः संविधानसभाय् दुथ्याःगु २७ दल जानाः दयेकूगु उच्चस्तरीय राजनीतिक कार्यदलया छुं हे औचित्य मदुगु खँ संविधानसभाया संवैधानिक समितिया अध्यक्ष निलाम्बर आचार्यं धयादीगु दु ।
संविधानय् थज्याःगु कार्यदल गठन यानाः ज्या यायेगु छुं हे प्रावधान मदुगु कारणं यानाः थुकिं याःगु छुं नं कथंया निर्णययात संविधानसभां मान्यता बीमाःगु आवश्यकता मदुगु खँ नं वय्कलं धयादीगु दु। थ्वं याःगु निर्णय वैध जुइ मखु धासें वय्कलं कार्यदलया निर्णययात माने यायेमाःगु आवश्यकता मदुगु खँ नं धयादीगु दु ।
कार्यदलं ज्या याःगु कारणं संविधानसभाया थीथी समितित निष्त्रिय जुयाच्वंगु दावी नं वय्कलं यानादिल। संविधानसभाया समितिइ नं थीथी पार्टीया दुजःत हे दुगु कारणं छुं निर्णय यायेमाःसा उगु समितित मार्फत हे याःगु जूसा व बांलाइगु व उकिं संविधानसभाया नं इज्जत च्वनीगु बिचाः प्वंकादिल ।
संविधानसभाया थीथी समितितय्सं निर्णय याये मफयाः २१० गू न्ह्यसःत थाति तयातःगु खः। व फुक्क न्ह्यसःत थुगु कार्यदलय् तयाः छलफल याये हःगु खःसा उकी मध्ये ७५ प्रतिशत न्ह्यसःया लिसः लुइकेधुंकूगु दावी कार्यदलं याःगु दु ।
कार्यदलपाखें धमाधम निर्णय याना यंकूगु कारणं आः कार्यदलया म्याद थपे यानाः संविधानसभां ज्यंके मफयाच्वंगु समस्यात थुकिं हे ज्यंका वनेमाली धइगु सुझाव वयाच्वंगु इलय् आचार्यया थ्व धापू पिहां वःगु खः ।
