पारसयात कारवाही यायेगु जुइ: प्रम नेपाल
येँ (सन्ध्या टाइम्स)/उपप्रधानमन्त्री सुजाता कोइरालाया जिलाजंयात गोलीं कयेकूम्ह पुलांम्ह युवराज पारस शाहयात कानुनी कारवाही यायेगु खँ प्रधानमन्त्री माधव कुमार नेपालं नं धयादीगु दु ।
थौं सुथय् संसदया सार्वजनिक लेखा समितिइ बयान बीत उखे झाःम्ह प्रम नेपालं बयान बियाः पिहां वयेधुंकाः सञ्चारकर्मीतलिसे खँ ल्हासें थ्व खँ धयादीगु खः। उगु घटनायात कयाः माःगु छानबीन न्ह्याकेत थम्हं गृहमन्त्रीयात निर्देशन बीधुनागु दु धासें वय्कलं यदि दोषी खनेदत धाःसा शाहयात कारवाही जुइगु खँ नं कनादिल। वय्कलं धयादिल, 'कानून स्वयां सुं नं च्वय् मखु, गल्ती यात धाःसा वयात नं कारवाही जुइ ।'
गोली काण्डयात कयाः सरकारं छानबीनया ज्या न्ह्याकेधुंकूगु दु। थ्व विषयय् ज्ञाता कानूननविद्तय्सं धाः कथं यदि थुकी दोषी खने दत धाःसा कर्पिनि ज्यान कायेगु कुतः याःगु द्वपनय् शाहयात १६ दँ तकया कैद जुइफुगु खँ धाःगु दु। शाहयात ज्वनाः कारवाही यायेत नेपाली कांग्रेसं नं जोडदार रुपं इनाप यायेधुंकूगु दु ।
