नेपाःया सम्पदा बारे गोष्ठी क्वचाल

येँ (सन्ध्या टाइम्स)/लोटस रिसर्च सेन्टर, यल व आशा सफूकुथि, येँया मंकाः ग्वसालय् वंगु शनिवाः स्टाफ कलेज, जावलाखेलय् "नेपाःया सम्पदा संरक्षण" बारे छन्हुया गोष्ठी जुल। गोष्ठीया उलेज्या यानादिसें लुम्बिनी बौद्ध विश्वविद्यालयया उपकूलपति डा. त्रिरत्न मानन्धरं सम्पदा संरक्षणय् संग्रह, संरक्षण व प्रसार स्वता खँ तसकं महत्वपूर्ण जू धयादिल। मूज्यापौ न्ह्यब्वयादिसें नेशनल डायात लाइब्रेरी, जापानया पुलांम्ह डेपुटि लाइब्रेरीयन भाजु आकिओ यासुएनं सम्पदा संरक्षणय् विश्वय् जुयाच्वंगु थीथी ज्या व यायेमाःगु ज्या बारे दुग्यंक चर्चा यानादिल।
अथे हे ज्याझ्वलय् राष्ट्रिय अभिलेखालयपाखें भीमप्रसाद नेपाल, त्रिविवि केन्द्रीय पुस्तकालयपाखें चिरञ्जीवी न्यौपाने, नेपाल राष्ट्रिय पुस्तकालयपाखें दशरथ थापा, आशासफू कुथिपाखें राजा शाक्य व बुद्धिष्ट लाइब्रेरी जापान, नागोयापाखें स्यूचो ताकाओकापिसं थीथी विषयया ज्यापौ न्ह्यब्वयादीगु खः। लोटस रिसर्च सेन्टरया नायः डा. भद्ररत्न बज्राचार्यया सभापतित्वय् जूगु ज्याझ्वलय् भिंतुना न्वचु बियादिसें आशा सफूकुथि गुथिया नायः पद्मरत्न तुलाधरं न्ह्यागुं ज्याझ्वः यायेबलय् अन उपस्थित बहुसंख्यक व्यक्तिपिनिगु मांभाय् छ्यलेमाःगुली बः बियादिल ।

ज्याझ्वःया सहलहय् भवेश्वर पँगेनी, पुष्पबहादुर चित्रकार, राजेन्द्रमान बज्राचार्य, मीनबहादुर शाक्य व हिरण्यराज बज्राचार्यपिसं थीथी न्ह्यसः न्यनाः थीथी सुझाव नं बियादिगु खः। ज्याझ्वलय् लसकुस लोटस रिसर्च सेन्टरया नायः डा. भद्ररत्न वज्राचार्यं यानादीगु खःसा सुभाय् न्वकु इन्द्रसिद्धि बज्राचार्यं बियादीगु खः ।