पारस प्रहरी नियन्त्रणय् / निगू अभियोगय् मुद्दा चले यायेगु तयारी
पारसया समर्थनय् प्रदर्शन
चितवन स्थित टाइर टप्स होटलय् उपप्रधान नापं परराष्ट्रमन्त्री सुजाता कोइरालाया जिलाजं रुवेल चौधरीयात गोलीं क्येकूम्ह पुलाम्ह युवराज पारस साहयात थौं प्रहरीं ज्वंगु दु ।
जिल्ला प्रहरी ज्याकू चितवनं पारस विरुद्ध पक्राउ पुर्जी जारी यायेवं कास्की स्थित पुलबारी रिसोर्टय् दुम्ह शाहयात प्रहरीं ज्वंगु खः । जिल्ला प्रहरी ज्याकू चितवनं मनू स्यायेत स्वःगु धासें मुद्दा नम्बर १६६ दर्ता यायेवं पारस विरुद्ध पक्राउ पुर्जी जारी याःगु खः । प्रहरीं अन कडा सुरक्षाया दथुइ पारसनाप घौच्छि बयान कायेधुंकाः फिस टेल हेलिकप्टरय् तयाः भरतपुर स्थित प्रहरी तालिम केन्द्रय् यंकूगु दु ।
प्रहरी तालिम केन्द्रय् पारसयात गन तयेगु व गुकथंया व्यवहार यायेगु बारे सहलह जुयाच्वंगु दु । अनया जिल्ला प्रमुख अधिकार व गृह मन्त्रालयं प्रमुख डिआइजी गंगा पाण्डेया नेतृत्वय् गठन याःगु छानबिन समितिया दुजःत दथुइ सहलह जुयाच्वंगु दु ।
थ्वस्वयां न्ह्यः फुलबारी रिसोर्टय् दुम्ह पारसं थः स्वास्थ्यया हुनिं हेलिकप्टरय् च्वनाः वनेमफुगु धासें लिचिलेत स्वाःगु खःसां सनिलय् ५ बजे थःगु पूर्व अडान त्वाताः छम्ह स्वास्थ्यकर्मी सहित प्रहरी नापं भारतपुर वंगु खः । पारसयात ज्वनेत अन एसएसपी केशव अधिकारीया नेतृत्वय् प्रहरी परिचालन जूगु खः ।
पासरयात कन्हय् चितवन जिल्ला अदालतय् सार्वजनिक अपराध व हातहतियार तथा खरखजना अपराधय् मद्दा चले यायेगु तयारी यानाच्वंग दु । सार्वजनिक अपराधा अभियोगय् मुद्दा प्रमाणित जुसाः धरौटीलय् रिहा जुइफइगु व्यवस्था दु । उखे हातहतियार व खरखजना अभियोगय् मुद्दा प्रमाणित जुसाः ६० हजार निसें छगू लख ४० हजार तक जरिवाना वा ३ दँ निसें ७ दँ तक कैद वा निगूलिं जुइफइगु व्यवस्था दु ।
थ्वहे दथुइ पारस शाहयात ज्वनेवं देय्या थीथी थासय् वय्कःया समर्थनय् जुलुस व मसाल जुलुस पिहांवःगु दु । येँय्या चावहिली, गौशाला, बसन्तपु नापं चितवन, बुटवल, कैलाली लगायतया थासय् नं पारसयात त्वते माःगु माग यासें जुलुस पिहांवःगु खः ।
'परास शाह जिन्दावाद', 'सुजाता मुर्दावाद', 'सुजातायात फाँसी ब्यू' थंज्याःगु नारा थ्वयेकाः पारसया समर्थकतय्सं जुलुस पिथंगु खः ।
