अनावश्य बुखँया खण्डन यायेगु आवश्यकता मदु : प्रम
प्रधानमन्त्री माधवकुमार नेपालं नेपाल वायु सेवा निगमयात विमान न्यायेगु विषयलय् थःम्हं अख्तियारयात छुं नं कथंया दवाब मबीयागु खँ धयादीगु दु ।
व्यवस्थापिका संसद अन्तर्गतया सार्वजनिक लेखा समितिलय् मंगलवाः स्पष्टिकरण बियादिसें प्रधानमन्त्री नेपालं नेपाःया राष्ट्रिय कम्पनी विमान विहीन मुइमाः धकाः थःम्हं याकनं विमान न्यायेत निर्देशन जक बियागु खँ धयादिल ।
वय्कलं विमान न्यायेगु निंतिं सहज वातावरण दयेकेत अख्तियारया सचिवयात थःम्ह दवाब बियागु बुँख अनावश्यक जूगु धासें अज्याःगु बुखँया खण्डन यायेगु आवश्यकता मदुगु धासें थः नं पारदर्शी ढंगं न्हूगु विमान न्यायेमाःगु पक्षय् दुगु स्पष्ट यानादिल ।
नेपाल वायु सेवा निगमयात विमान न्यायेगु निंतिं सहज वातावरण दयेकेत अख्तियारया सचिवयात प्रधानमन्त्री नेपालं दवाब ब्यूगु बुखँ सार्वजनिक जुइवं सार्वजनिक लेखा समिति वय्कःनाप स्पष्टिकरण काःगु खः ।
