पुस ४ गते विशेष अधिवेशन आव्हान

राष्ट्रपति डा. रामवरण यादवं पुस ४ गतेया निंतिं व्यवस्थापिका संसदया विशेष अधिवेशन आव्हान यानादीगु दु ।

राष्ट्रपतिया ज्याकथीं सोमवाः सनिलय् छगू विज्ञप्ति पिथना १८७ सभासदतय्सं दर्ता याःगु समावेदनया आधारय् नेपाःया अन्तरिम संविधानया धारा ५१या उपधारा (३) बमोजिम अधिवेशन सःताःगु खँ न्ह्यथंगु दु ।

थ्वस्वयां न्ह्यः थौं हे राष्ट्रपति यादवं संसदया अधिवेशन आव्हानया बारे प्रधानमन्त्री माधवकुमार नेपाल, सभामुख सुभाषचन्द्र नेम्वाङलगायत नाप परामर्श यानादीगु खः । म्हिग माओवादी लगायत खुगू राजनीतिक दलया १८७ सभासदतय्सं विशेष अधिवेशन आव्हानया निंतिं राष्ट्रपति समक्ष समावेदन दर्ता याःगु खः ।