'झी फुक्कं मिलेजुया लोकतन्त्रयात बल्लाकेमाः '
राष्ट्रपति डा. रामवरण यादवं लोकतन्त्र थः हे बलाइगु मखसें फुक्कं मिलेजुया थुकीयात बल्लाकेमाःगु धयादीगु दु ।
येँय् थनिंनिसें शुरु जूगु पुलांपिं सांसद मञ्चया निन्हुयंकया राष्ट्रिय भेलायात सम्बोधन यासें राष्ट्रपति डा. यादवं फुक्कं मिले जुयाः शान्तियात पलिस्था यायेमाःगु धयादिल । वय्कलं मुख्य राजनीतिक दलत जिम्मेवार जुयाः संविधान निर्माण व शान्ति प्रकृयायात निष्कर्षय् थ्यंकेमाःगु धयादिल । राष्ट्रपति यादवं सहमतिया विकल्प मदुगु धासें सहमतिया आधारय् समस्याया निकास मालेत दलतय्त इनाप यानादिल ।
ज्याझ्वलय् संविधानसभा नायः सुवासचन्द्र नेम्वाङं दलत दथुइया एकता आवश्यकता जूगु धासें हात्तिवन निसें गोकर्ण तक जूगु मुँज्यायात हानं निरन्तरता बीत इनाप यानादिल । वय्कलं दलतय्त संवादयात निरन्तारता बियाः जनतायात राहत बीत नं इनाप यानादिल ।
नेपाली कांग्रेसया सभापति सुशिल कोइरालां धाःसा संविधान निर्माण व शान्ति प्रकृया निर्धारित इलय् निष्कर्षय् थ्यनीगु धासें फुक्कसित धुक्क जुइत इनाप यानादिल । कोइरालां माओवादी नायः पुष्पकमल दाहाल 'प्रचण्ड'नाप थःगु वार्ता सकारात्मक ढंगं न्ह्याः वंगु खुलासा यासें लोकतन्त्रया भविष्य उज्जवल दुगु धयादिल ।
नेकपा (एमाले)या नायः झलनाथ खनालं धाःसा सहमतिया निंतिं एमाले तयार दुगु व एमाले न्ह्यागु नं त्याग यायेत तयार दुगु धासें कांग्रेस व माओवादी नं सहमतिया निंतिं त्याग यायेत तत्पर जुइमाःगु धयादिल ।
