अधिवेशन सःतेत प्रमयात कानूनविद्तय् सुझाव
येँ (सन्ध्या टाइम्स)/एकीकृत माओवादी नापं संविधानसभाय् दुथ्याःगु मेमेगु चिचीधंगु दलतय्सं व्यवस्थापिका संसदया अधिवेशन सःतेत राष्ट्रपतियाथाय् समावेदन दर्ता यायेधुंकूगु अवस्थाय् सरकारं नियमित अधिवेशन सःतूसां जिउ धकाः कानूनविद्तय्सं प्रधानमन्त्री माधवकुमार नेपालयात सुझाव बियादीगु दु ।
थौं प्रधानमन्त्री नेपालं थःगु हे निवासय् कानूनविद्तलिसे सहलह ब्याकूगु इलय् वय्कःयात थज्याःगु सुझाब बिउगु खः। उगु सहलह ज्याझ्वलय् ब्वति कयादीम्ह अधिवक्ता टिकाराम भट्टराईं सरकारं नियमित अधिवेशन सःते फइगु प्रावधान दु धकाः सुझाव बियागु खँ न्ह्यथानादीगु दु ।
उगु सहलह ज्याझ्वलय् गृहमन्त्री भिम रावल, अर्थमन्त्री सुरेन्द्र पाण्डे, कानुनमन्त्री प्रेमबहादुर सिंह, नेपाली कांग्रेस संसदीय दलया नेता रामचन्द्र पौडेल व रमेश लेखक नं उपस्थिति जुयादीगु खः। अधिवक्ता भट्टराईं धयादिल, 'संसद अधिवेशनया नितिं समावेदन दर्ता यायेधंकूगु अवस्थाय् नं जिपिं सकसिनं छगू हे मतं सरकारं नियमित अधिवेशन सःतेफइ धकाः सुझाव बिया थकागु दु।'
उगु परामर्श ज्याझ्वलय् हरिकृष्ण कार्की, अग्नी खरेल, हरिहर दाहाल नापं मेमेपिं कानून ब्यवसायीत नं दुथ्याःगु खः ।
संसद अधिवेशनया निंतिं म्हिगः प्रमुख प्रतिपक्षी माओवादी नापं मेमेगु दलया सांसदतय्सं समावेदन राष्ट्रपतियाथाय् दर्ता याये धुनेवं प्रधानमन्त्री नेपाल आः गुगु कथं न्ह्याः वनेगु धइगु खँय् सहलह यायेत थनिनिसें ब्यस्त जुयादीगु खः ।
