संस्कृति ल्यंकेत ग्वःजा दयेकेगु तालिम
येँ (सन्ध्या टाइम्स)/उदाय् समाजया मिसा पुचःपाखें तःनिगः बःनिगः (ग्वःजा) दयेकेगु तालिम बीगु ज्या जुल। श्री दिगुख्यः गुथि छेँय् उदाय् समाजया नायः डा. रुप ज्योति कसाःया सभापतित्वय् न्ह्याःगु उगु ज्याझ्वलय् समाजया आपालं दुजःपिनि उपस्थिति दुगु खः ।
ज्याझ्वलय् वज्रयान गुरुजु डा. नरेश बज्राचार्यं ग्वःजाया आकारप्रकार, बनावट व थुकिया साँस्कृतिक व धार्मिक महत्वया बारे ध्वाथुइक कनादीगु खः। ज्याझ्वलय् न्ववासें डा. सुमन कमलं सयेके�सीके धयागु भिंगु व मंगल ज्या खः धासें थज्याःगु ज्याझ्वःत इलय् ब्यलय् न्ह्याकेमाःगु खँ कनादिल। संरक्षक कुलवीरसिं तुलाधरं थज्याःगु ज्यां संस्कृति ल्यंकेत जूसां झीपिं ईब्यःकथंया पूजा विधि कःघानाः न्ह्याःवने माःगु खँ कनादिल ।
सभानायः डा. रुपज्योति कसाःजुं उदाय् समाजया उद्देश्यकथं ज्याखँ न्ह्याका वनेगु व भावि ज्याखँत शिक्षा, कानून, स्वास्थ्य विषयय् काउन्सिलिङ्ग सेल दयेकाः न्ह्याकेगु खँ कनादिल ।
ज्याझ्वलय् पूर्णदेवी बानिया, सुवर्णलक्ष्मी बानिया, परमशोभा कसाः व कर्णदेवी तुलाधरपिंसं स्यनेगु ज्या यानादीगु खः। उदाय् समाजया मिसा पुचःया संस्कृति संरक्षणकथं उगु ज्याझ्वः न्ह्याःगु धासें ज्यासना पुचःया संयोजक प्रेमहिरा तुलाधरं लसकुस यानादीगु खः ।
